King'ang'a watakiwa kuchangia maendeleo

Tarehe iliyowekwa: July 3rd, 2019

Wananchi wa King’ang’a wametakiwa kujitoa kwa kuchangia miradi ya maendeleo ili kuunga mkono juhudi za serikali zinazofanywa katika eneo lao.

Kauli hiyo ilitolewa na Mkurugenzi wa Halmashauri ya Mji Msoleni Dakawa alipokuwa akiongea na wajumbe wa kamati ya ujenzi katika Shule ya Msingi King’ang’a wakati wa ziara ya ukaguzi wa miradi ya maendeleo inayotekelezwa katika kata mbalimbali za halmashauri ya mji.

Alisema kuwa katika maeneo yote aliyopita yenye miradi ya ujenzi wa madarasa wananchi wa eneo hilo ndio ambao wako nyuma sana katika kuchangia nguvu za wananchi hali inayowavunja moyo viongozi kuendelea kuwapelekea miradi jambo ambalo litawaumiza wananchi.

“Mna bahati sana wananchi wa hapa mmepata bahati ya kuletewa fedha za kutekeleza miradi ya ujenzi wa madarasa ya kisasa na vyoo lakini wananchi hawachangii chochote kuunga mkono jitihada hizo kumbukeni kuwa kwa kufanya hivyo ni kuvidhulumu vizazi vyenu viliyopo na vijavyo.”Alisema Mkurugenzi Dakawa.

Aliendelea kuwaeleza kuwa wanapochangia maendeleo na kuboresha miundombinu ndipo wanapoongeza pia kiwango cha ufaulu kwani wanafunzi wanakuwa na mazingira mazuri ya kujifunzia na walimu mazingira mazuri ya kufundishia.

Kwa upande wake Afisa Mipango wa Halmashauri ya Mji Kondoa Amani Kaunga aliwasihi wananchi wa King’ang’a kuwa na uchungu na maendeleo ya eneo lao na kuachana na migogoro isiyokuwa na tija kwani inawapotezea muda wa kufanya shughuli za maendeleo

Shule ya Msingi King’ang’a ni moja ya shule iliyopatiwa fedha zaidi ya shilingi milioni 70 kutoka serikali kuu kwaajili ya umaliziaji na wa madarasa manne, ofisi ya walimu na vyoo vya wanafunzi.