Aliyevamia eneo la stendi Bicha apewa siku saba kuvunja nyumba

Tarehe iliyowekwa: September 2nd, 2022

Mwananchi aliyejulikana kwa jina la Mohamed Fonga aliyevamia na kujenga eneo la mradi wa viwanja vya stendi ya Bicha amepewa siku saba kuvunja nyumba aliyojenga kwa kuwa alishapewa fidia ya eneo hilo shilingi milioni 40 hapo awali.

Kauli hiyo imetolewa na Mkurugenzi wa Halmashauri ya Mji Kondoa Ndg. Paul Mamba Sweya wakati  kamati ya fedha na Utawala kwa ajili ya kukagua mali za Halmashauri ilipofika kukagua eneo la mradi wa stendi ya Bicha hivi karibuni.

“Cha pili tunamtaka arudishe mabati aliyoiba katika choo cha stendi, matofali na fremu tatu za milango zilizokuwepo katika eneo la mradi na sitaki kumuona ofisini kwangu kuhusu suala la hapa ila akija kama mwananchi mwingine nitamuhudumia kwanza tumefahamiana kwa kuwa migogoro wakati mwingine inaleta hali ya kufahamiana,”amesema Mkurugenzi Sweya

Aidha amemtaka kutekeleza agizo la kuijibu barua aliyomwandikia Mhe. Mkuu wa Mkoa na Mhe. Mkuu Wilaya akimshukuru kumrudishia eneo lake na nakala ampatie Mkurugenzi  ikiwa ni pamoja na kuwaomba msamaha viongozi kwa kuwa aliwadanganya.

“Tukiruhusu viongozi wetu ambao Mhe. Rais anawateua  watumike vibaya sababu ya ujuaji hatuwezi kufika mbali na kwa vile nimeona umuhimu wa hili tuna viongozi wa TAKUKURU hapa na OCD ametuma watu wawili hili suala lisipo tekelezwa Mwanasheria mchukue hatua wizi wa mabati,matofali, uvunjaji wa becon na miti tuliyoilipia ikachukuliwa virejeshwe hapa,”amesisitiza Mkurugenzi Sweya

Akiongea Mwenyekiti wa Halmashauri ya Mji Mhe. Mohamed Kiberenge amesema maagizo ya Mkurugenzi yatekelezwa sababu ni agizo la kiutendaji na kuwataka waliokuwa wakilalamika wkatekeleze maagizo na mambo mengine ambayo yapo kisheria yakaendelee.

“Naomba sasa hili lifike mwisho na mradi uendelee kama tulivyokubaliana na hii ni kamati ya fedha ambayo inasimamia mali za Halmashauri kwa kushirikiana wataalam na madiwani kwa hiyo niwaombe sasa nyie mna nafasi ya kuzungumza na wanasheria kwa sababu sisi ni vyombo vinasimama na nyie hatuna muda wa kusikiliza kesi tena kwasababu tulisha maliza na kuwalipa fidia kwa hiyo mtaendelea kukiri kwenye vyombo,”amesisitiza Mhe. Kiberenge.

Ndg. Fonga ni mmoja wa wananchi waliolipwa fidia ili kupisha eneo kwa ajili ya mradi wa ujenzi wa stendi ya mabasi Bicha na viwanja ambapo alilipwa shilingi milioni 40 ikiwa ni kwa ajili ya eneo, makaburi, miti na gharama za usumbufu ambapo amerudi na kujenga katika eneo hilo kinyume na taratibu za fidia.A