Baraza la Madiwani lapitisha kukusanya shilingi bilioni 22.2 kwa mwaka wa fedha 2025/2026

Tarehe iliyowekwa: January 27th, 2025

Baraza la Waheshimiwa Madiwani Halmashauri ya Mji Kondoa limepitisha mpango na bajeti kwa mwaka wa fedha 2025/2026 kukusanya shilingi bilioni 22,268,656,964.31kutoka vyanzo vya ndani, ruzuku kutoka Serikali Kuu na Wahisani.

Mpango na bajeti huo umepitishwa katika kikao maalum cha Baraza la Waheshimiwa Madiwani kilichofanyika katika ukumbi wa mikutano wa Halmashauri ambapo kimehudhuriwa pia na Kamati ya Usalama, Wakuu wa Idara na Vitengo na Wakuu wa Taasisi mbalimbali za serikali na wananchi.

Akisoma mchanganuo wa makusanyo hayo Mkurugenzi wa Halmashauri ya Mji Kondoa Ndg. Said Majaliwa amesema katika makusanyo hayo shilingi bilioni 13,037,546,000 ni ruzuku ya Mishahara, Shilingi Bilioni 1,294,395,000 ni mapato mengineyo (OC) na shilingi bilioni 5,223,715,964.31 ni Ruzuku ya Maendeleo kutoka Serikali Kuu na Wahisani.

“Aidha Mheshimiwa Mwenyekiti pia Halmashauri imekadiria kukusanya shilingi bilioni 2,713,000,000 kutoka vyanzo vyake vya ndani ambapo katika makusanyo hayo shilingi milioni 773,000,000 ni mapato ya shughuli maalum (lindwa) na shilingi 1,940,000,000 ni mapato ya ndani,”amesema Mkurugenzi Majaliwa

Ameendelea kueleza kuwa bajeti ya mwaka wa fedha 2025/2026 ina ongezeko la shilingi milioni 413,000,000 ukilinganisha na bajeti ya mwaka wa fedha 2024/2025 na ongezeko hilo limekuja baada ya kubuni vyanzo vipya vya mapato.

“Mpango na bajeti hii umelenga kutekeleza vipaumbele vilivyoainishwa katika Mpango wa Maendeleo wa Taifa wa miaka mitano 2021/22 – 2025/2026 ambavyo nimegawanyika katika maeneo ya kubuni vyanzo vipya, kuendelea kumalizia miradi viporo,kuboresha  hifadhi ya Mazingira na Mipango Miji na kukuza usawa wa kijinsia na kuwezesha  makundi maalum,”amesisitiza Mkurugenzi Majaliwa.

Kwa upande wake mwakilishi wa Ofisi ya Mkuu wa Mkoa Ndg. Erick Mtikahela amepongeza maandalizi ya bajeti yaliyofanywa na Halmashauri na kushauri kuendelea kuongeza vyanzo kwa kuwa ni agizo la Serikali na kuhakikikisha wanafikia malengo waliyojiwekea mwaka 2024/2025.

Akifunga kikao hicho Mwenyekiti wa Halmashauri ya Mji Kondoa Mhe. Mohamed Kiberenge amewashauri Waheshimiwa Madiwani Kwenda kuhamasisha wananchi kuchangia nguvu zao katika kuanzisha miradi ya maendeleo ili fedha zitakazoletwa na Halmashauri ziweze kumalizia miradi hiyo.