Baraza la Madiwani lapongeza utendajikazi wa pamoja

Tarehe iliyowekwa: January 29th, 2025

Baraza la Waheshimiwa Madiwani katika Halmashauri ya Mji Kondoa wamepongeza utendaji kazi wa Mkurugenzi na watumishi wake katika ngazi zote hali inayopelekea mambo mengi kufanyika kwa wakati na kurahisisha utoaji huduma kwa wananchi.

Pongezi hizo zimetolewa na Mwenyekiti wa Halmashauri ya Mji Kondoa Mhe. Mohamed Kiberenge wakati wa baraza la kata la kujadili taarifa za kipindi cha robo ya pili kwa mwaka wa fedha 2024/2025 lililofanyika katika ukumbi wa mikutano wa Halmashauri.

“Mkurugenzi umerudisha moyo wa utendaji kazi kwa watumishi tunakupongeza sana japokuwa wapo wachache wanahitaji kuendelea kubadilishwa lakini mnafanya kazi nzuri tumeona hata kwenye upitishaji wa bajeti mlivyofanya imekuwa shirikishi katika vikao vyote vya kisheria imejenga uelewa wa Pamoja wa wajumbe wote,”amesema Mhe. Kiberenge

Ameongeza kwa kusema kuwa waendeleze umoja wao kwa kuhakikisha wanawashirikisha kwa ukaribu zaidi watendaji katika katika kazi ya ukusanyaji wa mapato ili kuweza kufikia malengo yaliyowekwa.

Aidha ameshauri kuendelea kufuatilia kibali cha ajira katika mamlaka za juu kwa lengo la kupata watendaji ambao watasaidia katika kuboresha utendaji kazi na kuipaisha halmashauri katika Nyanja tofauti.

Pia amepongeza matokeo ya kidato cha nne na pili kwa shule zilizofanya vizuri na kushauri kuendelea kuwa karibu na wanafunzi kwa ajili ya kuongeza GPA jambo ambalo litafanikiwa iwapo wahusika wote watashirikiana.

“Mkurugenzi katika kata ya Kilimani na kata zingine kuna maeneo ya wazi ya Halmashauri baadhi ya watu wamejimilikisha tunaomba yafuatiliwe na tunaomba katika maeneo ambayo yamepimwa watu wasijenge kiholela wafuate taratibu zote za kisheria,”amesema Mwenyekiti Kiberenge

Kwa upande wake Mkurugenzi wa Halmashauri ya Mji Kondoa Ndg. Said Majaliwa amewashukuru Waheshimiwa madiwani kwa pongezi walizozitoa ambapo amesema wataendelea kudumisha umoja huu kwa kuhakikisha unajenga familia moja na kuifanya Halmashauri kuwa na sifa za kuwa Manispaa.

“Kuhusu suala la kibali cha watumishi tutaendelea kufuatilia ambapo kwasasa tunaendelea kuhakikisha maeneo ambayo hakuna watendaji tunapambana kuajili kwa mkataba ili kazi zisikwame lakini pia niwashauri watendaji wa kata penye changamoto toeni taarifa wakati wowote ili tuweze kuhakikisha wananchi wanapata huduma,”amesema Mkurugenzi Majaliwa

Baraza la Madiwani la kazi limefanyika kwaajili ya  kujadili taarifa za utendaji kazi kwa robo ya pili kwa mwaka wa fedha 2024/2025 kutoka katika kata zote 8 za Halmashauri na limehudhuriwa na Kamati ya Usalama, Wakuu wa Idara na vitengo pamoja na Maafisa Tarafa za Kondoa Mjini na Kolo.