Baraza wa Waheshimiwa Madiwani Kondoa Mji lajivunia mafanikio bila migogoro

Tarehe iliyowekwa: October 31st, 2024

Baraza la Halmashauri ya Mji Kondoa limejivunia mafanikio kwa kipindi cha miaka minne toka walipoingia madarakani kwa kutokuwepo kwa migogoro yoyote iliyozalishwa ikiwa ni pamoja na kujenga ya ushirikiano kati ya Halmashauri, wananchi na taasisi zingine zilizopo ndani ya Halmashauri ya Mji.

Hayo yamesemwa na Mwenyekiti wa Halmashauri ya Mji Kondoa Mhe. Mohamed Kiberenge wakati wa kikao cha baraza la Waheshimiwa Madiwani cha robo ya kwanza kwa mwaka wa fedha 2024/2025 kilichofanyika katika Ukumbi wa mikutano wa Halmashauri ya Mji Kondoa.

“Halmashauri imepiga hatua sasa Waheshimiwa Madiwani twendeni tukasimamie changamoto ndogondogo zilizobakia tuakashirikiane na viongozi wengine wa Serikali za Mitaa watakaochaguliwa ili nao wajue ni wajibu wao kusimamia moja kwa moja majukumu ya wananchi ikiwemo kusimamia miradi ya maendeleo,”amesema Mhe. Kiberenge

Aidha amemshukuru Mkurugenzi wa Halmashauri Ndg. Said Majaliwa na timu ya Menejimenti kwa kusimamia kwa karibu miradi ya maendeleo na kuhakikisha huduma stahiki inafika kwa wananchi na kuendelea kushirikiana kwa pamoja katika kipindi kilichobakia kabla ya uchaguzi mkuu wa mwaka 2025 na kuepuka migongano isiyo na tija kati yao.

Akitoa salamu za mkoa Ndg. Erick amesema Halmashauri inapaswa kuendelea kusimamia suala la ukusanyaji wa mapato na kubuni vyanzo vipya kwa kuwa ndiyo yanayochangia halmashauri kujiendesha pamoja na kusimamia kanuni za utoaji wa mikopo unaotarajia kuanza hivi karibuni kwa kuepuka kufanya vitendo ambavyo vilisababisha mikopo hiyo ikasitishwa hapo awali.

Naye Mkurugenzi wa Halmashauri ya Mji Kondoa Ndg. Said Majaliwa amesema kuwa maagizo yote yaliyoyatolewa ameyapokea na kuahidi kuendelea kushirikiana na Menejimenti kuhakikisha kuwa wanafanya kazi kwa bidi zaidi na kukamilisha miradi kwa wakati na kukusanya mapato kama yalivyowekwa katika bajeti ya 2024/2025.

Baraza la Waheshimiwa Madiwani limekaa kwa ajili ya kujadili taarifa za kamati za kudumu za robo ya kwanza kwa mwaka wa fedha 2024/2025 ambapo pia taarifa za Wakala wa Barabara Mijini na Vijijini, Mamlaka ya Maji Mjini na Vijiji zilijadiliwa na limehudhuriwa pia na wakuu wa Idara na wananchi kutoka Halmashauri ya Mji Kondoa.