Bilioni 2.2 kutengeneza barabara saba na daraja moja Kondoa

Tarehe iliyowekwa: October 25th, 2022

Ofisi ya TARURA Wilaya ya Kondoa mbioni kuanza kutengeneza barabara saba na daraja moja zenye thamani ya zaidi ya shilingi bilioni 2.2 ikiwa ni miradi ya awamu ya kwanza kupata fedha katika bajeti ya mwaka wa fedha 2022/2023.

Hayo yamesemwa na Meneja wa TARURA Wilaya ya Kondoa Mhandisi Daudi Sweke wakati wa hafla ya kuwatambulisha wakandarasi sita watakaoanza kufanya kazi za kutengengeneza barabara iliyofanyika katika ukumbi wa Halmashauri ya Mji wa Kondoa ambapo mgeni rasmi alikuwa ni Mkuu wa Wilaya ya Kondoa.

Akiongea katika hafla hiyo Mkuu wa Wilaya ya Kondoa Dkt. Khamis Mkanachi amewataka wakandarasi hao kuongozana na wahandisi wa Halmashauri na Maaifa Tarafa kwenda kutambulisha miradi hiyo kwa wananchi ili wajue thamani, ukubwa wa barabara na muda wa utekelezaji wa mradi na kuachana na tabia ya kwenda kwa viongozi wa vijiji na mitaa wapatapo matatizo.

“Siyo pale unapokuwa umekwama hapana kutoka mwanzo unapoenda kwenda kwa mtu gonga hodi sidani kama inakupunguzia chochote kwa hiyo ni vyema kama kata na tarafa mkawatambulishe kule na kama kuna kitu kule ambacho kinahitajika kwa wananchi wanatakiwa wakifanye sisi tunapaswa tuwasemee wakandarasi kwa wananchi,”amesema Dkt. Mkanachi

Aidha amesema moja ya kazi ya jeshi la akiba ni kulinda miundombinu ya maeneo yenye miradi hii na jamii husika hivyo waelekezwe kuwa kuna mradi ikiwa ni pamoja na kumjua mkandarasi ili iwapo litatokea jambo lolote wajue wanatoa taarifa kwa nani kwa kuwa kuna baadhi ya wananchi huujumu mali za wakandarasi.

“Niwaombeni wakandarasi watu mnaowaleta kufanya kazi au kusimamia kazi wawe na uchungu na kazi zenu kwa kuwa kuna watu mnawapa kazi ila hawana uchungu na kazi zenu ye anachoangalia nalipwa  na ukumcheleweshea malipo analalamika kwa hiyo tafuta watu ambao kweli wana uchungu na kazi na wenye hamu ya kuona unamaliza kwa wakati,”amesisitiza Dkt Mkanachi

 Akiongea Mwenyekiti wa Chama cha Mapinduzi Wilaya ya Kondoa Mhe. Hija Suru amesema wanatarajia makubwa kupitia wakandarasi hao kwa kuwa ana imani hadi wamepata kazi hiyo wamepitia michakato mirefu hivyo wazingatie viwango vinazingatiwa na hawatavumilia kuona wananchi hawapati wanachostahili na kuwataka kukumbuka kuweka alama za michepuko panapostahili ili kuepusha ajali zisizo na ulazima.

Kwa upande wake Mwenyekiti wa Halmashauri ya Mji Kondoa Mhe. Mohamed Kiberenge amewataka wakandarasi watakaotekeleza mradi Kondoa Mji kuutekeleza kwa kuwa ni mradi wa kimkakati kwa kuwa unapita katika eneo linapopita bomba la mafuta ikiwa ni pamoja na kushirikiana na wananchi wa maeneo husika.

Mwenyekiti wa Halmashauri ya Wilaya ya Kondoa Mhe. Maguo Abdala amesema barabara huchochea maendeleo hivyo ujio wao ni mzuri pia akawaasa kushirikisha halmashashauri nzima ya kijiji na si wenyeviti peke yao ikiwa ni pamoja na kuwataka kuacha kufanya biasahara yam awe kwani kufanya hivyo ni kwenda kinyume na kazi zao.

Kaimu Mkurugenzi Halmashauri ya Mji Kondoa Ndg. Annette Nara amewaomba wakandarasi kutoa ushirikiano kwa wananchi na taasis kama shule za sekondari na msingi wanapowafuata kuomba mahitaji wasisite kuwasaidia.

Akiongea kwa niaba ya wakandarasi Ndg. Godiozo Tuyanywe amesema anawashukuru viongozi kwa maneno mazuri na wanahaidi kufanya kazi kwa wakati na kwa kuzingatia viwango ili thamani ya fedha iweze kupatikana kwa kuwa nia ni kusaidiana pande zote mbili.

Jumla ya miradi ya wakandarasi 7 wametambulishwa ambao watajenga barabara tano ambazo zitatengenezwa Kondoa  Vijijini  ni Thawi-Kwadinu, Kikore-Hurui, Intera-Nsolo,Pahi-Haubi na Unkuku-Loo aidha barabara zingine ni za kufanyia matengenezo ya kawaida sehemu korofi na muda maalum ambapo barabara zitakazotengenezwa ni Mkunduru-Kisaki,Itundwi-Bumbuta, Itaswi-Mahongo,Ntundwa-Hurui na Kinyasi Majengo-Itaswi-Chubi na Bereko- Kisese-Dachenche, Kisese-Kikore, Mapinduzi-Disa daraja moja ni raraja la Hurui kwa Kondoa Mji ni barabara ya Msui-Kingale-Serya na Munguri Swagaswaga ambapo barabara zote hizi zitatengenezwa kwa kiwango cha lami.