Bilioni 49.4 zatolewa kwa ajili ya miradi ya maendeleo Wilaya ya Kondoa

Tarehe iliyowekwa: February 20th, 2024

Zaidi ya bilioni 49.4 zimetolewa na serikali kuu, wadau wa maendeleo na wafadhili zimetolewa kwaajili ya utekelezaji wa maendeleo kwa kipindi cha Julai hadi Disemba 2023.

Taarifa hiyo imetolewa na Mkuu wa Wilaya ya Kondoa Dkt. Khamis Mkanachi wakati akiwasilisha taarifa ya utekelezaji wa Ilani ya Chama Cha Mapinduzi kwa kipindi cha nusu mwaka mbele ya wajumbe wa Halmashauri Kuu ya Chama katika Ukumbi wa CCM.

"Mhe Mwenyekiti fedha zilizoletwa na Serikali ni nyingi shukrani za dhati kwa Rais Mhe. Dkt. Samia Suluhu Hassan kwa kuleta fedha zote hizo na kutuamini tuliopewa dhamana na tutaendelea kuzisimamia fedha hizo kwa uaminifu" amesema Dkt. Mkanachi 

Aidha ameongeza kuwa fedha hizo zimetolewa kwa ajili ya utekelezaji miradi katika sekta za elimu, afya, barabara, maji na nishati ambazo zimelenga kuwasaidia wananchi kupata huduma.

"Katika sekta ya afya zimetolewa milioni 60 kwa ajili ya ukamilishaji wa zahanati lakini pia milioni 400 kwajili ya ununuzi wa dawa pamoja na bilioni 1.4 kwa ajili ya ununuzi wa vifaa tiba na kwasasa upasuaji unafanyika Kondoa hakuna haja ya kwenda Dodoma,"amesisitiza  Dkt. Mkanachi

Ameongeza kuwa kwa upande wa elimu serikali imeleta fedha kwa ajili ya ujenzi wa madarasa ya kisasa nyumba za walimu na shule mpya mbili za msingi zilizokamilika na zinatumika kwasasa.

"Kwa upande wa nishati serikali imetoa zaidi ya shilingi bilioni 19 kwa ajili ya kusambaza umeme na kuongeza nguvu ya umeme ambapo kati ya vitongoji 381 vya wilaya ya Kondoa vitongoji 217 vinapata umeme ambapo tuna uhakika hadi mwaka huu wilaya nzima itakuwa inapata huduma ya umeme" amesema Dkt. Mkanachi

Hata hivyo amewashukuru wabunge wa Wilaya ya Kondoa Mhe. Dkt. Ashatu Kijaji ambaye ni mbunge wa Kondoa Vijijini Mhe. Ally Makoa mbunge wa Kondoa Mjini kwa kuhakikisha fedha hizo zinakuja Wilayani kwa ajili ya wananchi wao.

Wakiongea kwa upande wao wajumbe wa kikao hicho wamempongeza Mhe. Mkuu wa Wilaya kwa uwasilishaji wa taarifa hiyo na kumuomba kusaidia kutatua changamoto zilizopo katika sekta ya afya ikiwemo upungufu wa watumishi.

Kikao cha Halmashauri kuu ya Chama Cha Mapinduzi kimefanyika kwa ajili ya kuwasilisha taarifa za utekelezaji wa Ilani ya uchaguzi ya mwaka 2020-2025 kwa kipindi cha Julai hadi Disemba 2023.