Bilioni 8 zatumika kutatua changamoto za wananchi Kondoa Mjini

Tarehe iliyowekwa: August 2nd, 2024

Shilingi bilioni 8 zilizotolewa na Serikali kuu, wafadhili mapato ya ndani ya Halmashauri na mfuko wa jimbo zimetumika katika kutatua changamoto katika sekta za elimu, maji, barabara, biashara na umeme zilizokuwa zikiwakabili wananchi wa kata ya Kondoa Mjini katika Halmashauri ya Mji Kondoa kwa kipindi cha miaka minne.

Hayo yamesemwa na Mwenyekiti wa Halmashauri ya Mji Kondoa Mhe. Mohamed Kiberenge alipokuwa akiongea kwenye mkutano wa hadhara wa kutangaza fedha za miradi zilizoletwa katika kata ya Kondoa Mjini uliofanyika katika viwanja vya Stendi ya Zamani.

“Hizi fedha zilizotolewa ni za Kondoa Mjini peke yake na kila kata imepewa mgao wake na nipo tayari kuelezea kila fedha iliyotolewa na kazi iliyofanya lakini nyie ni mashahidi mnakumbuka kulikuwa na mrundikano wa wanafunzi katika Shule ya Msingi Maji ya Shamba lakini serikali sikivu ikatusaidia tukajengewa shule mpya ya Msingi Migungani na kuondoa tatizo la mrundikano kwa wanafunzi,”amesema Mhe. Kiberenge

Ameendelea kueleza kuwa pia serikali imetoa fedha kwa ajili ya ujenzi wa sgule mpya ya Sekondari Tura Day ambapo imesaidia kwa kiasi kikubwa kupunguza umbali wa kutembea wanafunzi wanaomaliza Shule ya Msingi Mpalangwi na Kichangani.

“Nyie mashahidi fedha hizo zimejenga madarasa 10 Ula sekondari na kuongeza ufaulu kutoka asilimia 45 hadi asilimia 95, madarasa 12 Miningani na matundu ya vyoo, madarasa 6 Shule ya Msingi Mpalangwi, madarasa 4 Tumbelo ikiwa ni pamoja na kuongeza madarasa Shule ya Msingi Serengeni ambayo kwasasa imesajiliwa na kuwa shule kamili,”amesisitiza Mhe. Kiberenge

Kwa upande wa barabara amesema Serikali imetoa fedha kwajili ya kuunganisha mawasiliano kati ya Thawi na kata za Kondoa Mjini na barabara ya Iboni Gubali imeboreshwa ili iweze kupitika muda wote kwa lengo la kuongeza fursa za kujipatia kipato kwa kupitisha biasahara muda wote na kupunguza gharama za usafiri.

Aidha amempongeza mbunge wa Kondoa Mjini Mhe. Ally Makoa na Mbunge wa Viti Maalum mkoa wa Dodoma Mhe. Mariam Ditopile kwa kuwapambania wananchi wa Kondoa Mjini na kupunguza tatizo la maji kwa kiasi kikubwa na kuwaombea wananchi wa Kichangani waruhusiwe kuvuta maji majumbani kwao.

Akisoma taarifa ya utekelezaji wa miradi kata ya Kondoa Mjini Ndg. Samson Mtui amesema fedha zilizopokelewa  shilingi bilioni 2.5 kwa miradi ya elimu, shilingi milioni 26.7 mfuko wa jimbo, shilingi milioni 25 mapato ya ndani, shilingi milioni 172 vikundi vya wanawake,vijana na walemavu, mradi wa maji bilioni 4.5 na barabara shilingi bilioni 1.3 na kufanya kata Kondoa Mjini kuwa na miradi yenye gharama ya shilingi  bilioni 8.

Kwa upande wa wananchi wameomba kupatiwa msamaha wa kodi ya majengo hasa wazee wasiojiweza na kuomba kupunguziwa gharama za kuingiza umeme kutoka shilingi laki 3 hadi shilingi elfu 27 kwa kuwa wananchi hao wanakipato cha chini.

Kata ya Kondoa Mjini  inaundwa na mitaa 6 yenye wakazi 26179 ambapo wanaume ni 12675 na wanawake 13504 kwa sensa ya mwaka 2022 na zaidi ya asilimia 90% ya wakazi ni wafanyabiashara na Mwenyekiti amefanya mkutano huo ikiwa ni kata ya tatu kati ya 8 ambapo anaambatana na Wakuu wa Idara na Vitengo kutoka Halmashauri naTaasis zingine za Serikali.