"Caren akawe chachu katika michezo mashuleni"- Mkurugenzi Dakawa

Tarehe iliyowekwa: August 27th, 2019

Wakuu wa Shule za Sekondari Halmashauri ya Mji Kondoa wametakiwa kumtumia mwanafunzi Caren kama mfano wa kuigwa katika michezo ili kuibua vipaji zaidi katika shule zao.

Ushauri huo umetolewa na Mkurugenzi wa Halmashauri ya Mji Kondoa Msoleni Dakawa wakati wa hafla fupi ya kuwapongeza wanafunzi walifanya vizuri katika ngazi ya taifa na Afrika Mashariki hivi karibuni.

“Wakuu wa shule endeleeni kuwapa nafasi wanafunzi katika michezo ili kuibua vipaji tofauti vya michezo mashuleni ikiwa ni pamoja na kuwapa nafasi walimu wa michezo kuonyesha uwezo wao na kuzalisha vipaji zaidi kwasasa michezo ni ajira.” Alisema Mkurugenzi Dakawa

Aliongeza kwa kuwapa moyo wanafunzi walioshinda kuendelea na jitihada hizo na kuendelea kutumia fursa wanazozipata kuonyesha kuwa wanaweza kwani ukiamini katika kuweza unafikia malengo uliyojiwekea.

“Nawapongeza wote walioshiriki katika michezo tofauti na Caren aliyeng’ara katika michezo ya Afrika Mashariki shule iendelee kumuunga mkono katika juhudi zake ili aweze kuendelea kung’ara zaidi na kufika mbali kwani kitaaluma pia.”Alisisitiza Mkurugenzi Dakawa.

Kwa upande wake Kaimu Afisa Elimu Sekondari Mwalimu Pancracy Meleko aliwapongeza wanafunzi hao na kumpongeza Mkuu wa Shule ya Wasichana Kondoa kwa kuonyesha moyo wa kuwaunga mkono wanafunzi katika michezo na kuzalisha kipaji cha wanafunzi Caren.

“Nimewaita na Wakuu wa Shule zote ili mkawe chachu katika kuinua michezo na kwasasa dunia imemuona Caren ambaye anacheza michezo yote na anafanya vizuru kitaaluma hivyo tukaibue vipaji kama hivyo.”Alisema Mwalimu Meleko.

Aidha aliongeza kuwa Halmashauri kwa kuunga mkono jitihada zao itamzawadia mwanafunzi Caren kwa kumlipia ada yote ya kidato cha sita, kumpatia cheti cha ukumbusho na kumlipia ada ya likizo ya mwezi Desemba na wanafunzi wengine watapewa sare za shule na madaftari ya mwaka mzima.

Akiongea mwanafunzi Caren Molel alisema kuwa watanzania wanaweza kufanya vizuri katika michezo kikubwa ni wazazi kuwapa nafasi watoto wao ili waonyeshe vipaji kwani michezo ni ajira kwasasa.

Hafla ya kuwapongeza wanafunzi waliofanya vizuri katika UMISETA taifa na Afrika Mashariki iliyowakilishwa na mwanafunzi Caren ambaye amerudi na medali ya dhahabu na fedha pamoja na kuwa anacheza michezo yote ilihudhuriwa pia na wakuu wa Idara wa Halmashauri ya Mji Kondoa.