Chandimo watakiwa kushirikiana na kamati ya ujenzi wa madarasa

Tarehe iliyowekwa: May 5th, 2021

Wananchi wa mtaa wa Chandimo wameshauriwa kushirikiana na kamati ya ujenzi katika shule ya Msingi Chandimo na viongozi wa mtaa ili kukamilisha ujenzi wa vyumba viwili vya madarasa na vyoo baada ya kupata shilingi milioni 44 kutoka serikali kuu.

Ushauri huo umetolewa na Mkurugenzi wa Halmashauri ya Mji Kondoa Msoleni Dakawa wakati wa mkutano wa hadhara wa uhamasishaji wa utekelezaji wa miradi na wananchi wa Mtaa wa Chandimo uliofanyika katika uwanja wa Shule ya Msingi Chandimo.

"Tushirikiane na kamati hizi mlizozichagua wenyewe ili zifanye kazi iliyokusudiwa na wamalize kwa wakati na asitokee mtu yoyote awe kiongozi au mwananchi na kuwatoa katika kazi zao kwa kuwa wamechaguliwa kidemokrasia na tunaamini mnawaamini sababu ni waadilifu ba waaminifu",amesema Mkurugenzi Dakawa 

Aidha ameongeza kuwasihi wazazi kuwasomesha watoto wao ili wawasaidie baadae na kuachana na tabia ya kuwaoza watoto katika umri mdogo kwani kwa kufanya hivyo wanatenda ukatili kisheria kwa kumnyima mtoto haki zake kimsingi na kuahidi kuwachukulia hatua wananchi wote watakaobainika kuafanya hivyo na kuwafikisha katika vyombo vya usalama.

"Shule hii mna bahati kweli mwaka jana mlipata mradi wa nyumba ya mwalimu na madarasa mwaka huu tena mmepata madarasa mawili na matundu manne ya vyoo kwa kuwa mnajitoa katika shughuli za maendeleo mnaanza wenyewe kutokana na juhudi hizo serikali wanawaunga mkono endeleeni msikate tamaa maendeleo yanaletwa na wananchi wenyewe mtafika mbali," amesisitiza Mkurugenzi Dakawa 

Aidha Mkurugenzi ameagiza walimu wote wa Shule ya Msingi Chandimo kukaa shule ilipo kwa kuwa serikali ilijenga nyumba na kuahidi kuwachukulia hatua walimu wote watakaokaidi agizo hilo ili watoto wasome wakati wote.

Kwa upande wake Afisa Maendeleo ya Jamii Irene Mosha aliwataka wananchi kwa kushirikiana na walimu kuzuia utoto wa wanafunzi ikiwa ni pamoja na kuhakikisha wananchi wanautumia vizuri chakula walichovuna na kuwasisitiza vijana kuchangamkia fursa za mikopo ili waweze kujiinua kiuchumi.

Naye Mwenyekiti wa Mtaa wa Chandimo Shabani Issa amemshukuru Mkurugenzi kwa kufika katika eneo Lao na kuwapa moyo na kusema kuwa wananchi wa Chandimo wanajituma siku zote na ni wasikivu hivyo anaamini fedha zitatumika ilivyokusudiwa na kwa wakati.

"Vijana tujitume kwenye kazi za maendeleo na ni neema kubwa kwetu kupata miradi mingi hivi na hii nina imani kwa kuwa wengi huwa mnajitoa ikija miradi mnaishughulikia inakamilika kwa wakati tuendelee na moyo huo huo," amesema Mwenyekiti Shabani

Akiongea kwa niaba ya wananchi wa Chandimo Maulid Issa amemuomba Mkurugenzi kuongezwa ukubwa kwa kalvati la Dumi ili maji yasisambae maeneo mengine kwa kuwa mvua ikinyesha maji yaliyosambaa yanahatarisha usalama wa wanafunzi wanapokwenda shule.

Ziara ya uhamasishaji utekelezaji wa miradi umefanyika katika Shule ya Msingi Chandimo ambapo imepata fedha kiasi cha shilingi milioni 44 kwa ajili ya ujenzi wa madarasa na matundu manne ya vyoo na katika ziara hiyo alikuwepo Mkurugenzi, Afisa Maendeleo ya Jamii, Mhandisi ujenzi, Afisa Mipango na Afisa Manunuzi.