Chanjo ya UVIKO 19 ni hiari yenye umuhimu

Tarehe iliyowekwa: September 24th, 2021

Mkuu wa Wilaya ya Kondoa Dkt.Khamis Mkanachi amesema chanjo ya UVIKO 19 si lazima ila ni hiari yenye umuhimu mkubwa kutokana na madhara anayoyapata mgonjwa aliyepata maambukizi ya virusi hivyo.

Kauli hiyo ameitoa wakati wa kikao kazi cha kuweka mkakati wa uhamasishaji wa chanjo ya UVIKO 19 na kamati ya Afya ya Msingi kilichofanyika katika ukumbi wa mikutano wa Kondoa Irangi hivi karibuni.

"Wengi tumeshuhudia watu wanakufa ugonjwa upo lakini na chanjo ipo na niwakikishie ni salama kabisa niwaombe wataalam wa afya watoke kwenda kwa wananchi kuwafikishia elimu lakini pia kuhakikisha wanachanja ili kuokoa afya zao,"amesema Dkt. Mkanachi

Aidha amesema elimu inapoendelea kutolewa na chanjo iendelee kutolewa kwa kuwa si rahisi watu wote wakachanja kwa wakati mmoja hivyo wapo wataochanja leo na wengine kesho kutokana na kila mtu na mapokeo yake.

"Viongozi tuchanje sisi tunakutana na watu wengi tupo katika makundi hatarishi hivyo tuchanje kwanza sisi tusiishie kuhamasisha tu wengine na viongozi wa dini nawaombeni tuhamasishe watu wetu wachanje gharama za matibabu ni ghali sana,"amesisitiza Dkt. Mkanachi.

Akitoa elimu ya kirusi cha Corona Dkt.Nassoro Matuzya Mratibu wa Elimu ya Afya mkoa wa Dodoma amesema Tanzania ni nchi ya pili Afrika kuwa na kifaa cha kukagua ubora wa chanjo zinazotolewa iwapo zina protein inayohitajika na ndicho kilichotumika kupima chanjo inayotolewa Tanzania na kuthibitishwa ni salama.

"Chanjo ya J & J ndio chanjo pekee ambayo mtu anachoma mara moja tu na imethibitishwa na Shirika la Afya Ulimwenguni na haina madini yoyote kama inavyosemwa na ilihakikiwa na kamati ya kuchunguza chanjo iliyoundwa na Mhe. Rais Samia Suluhu Hassan,"amesema Dkt. Matuzya 

Naye mratibu wa chanjo Halmashauri ya Mji Kondoa Evance John amesema hadi kufikia Sept 23 jumla ya watu 1858 wamechanja katika wilaya ya Kondoa ambapo lengo ni kukamilisha chanjo 7000 zilizoletwa wilayani hivyo kila mtu akatumie elimu iliyotolewa kwa nafasi yake kuhamasisha watu wapate chanjo.

Wakitoa ushuhuda wa chanjo kaimu Mkurugenzi Halmashauri ya Mji Kondoa na Padre wa kanisa katoliki Itololo wamesema toka walipochanja hakuna madhara yoyote waliyopata maneno wanayosikia  ni ya watu wasio na nia njema na afya za watu nani maneno ya watu wa mitaani.

Kikao kazi cha Afya ya Msingi kimefanyika kuweka mikakati ya kuhamasisha chanjo ambapo wajumbe wamekubaliana kufikisha chanjo katika maeneo ya masokoni, minadani, mikutano ya hadhara, nyumba za ibada na vyuoni na walengwa watapewa elimu kabla ya kuchanjwa ambapo pia vituo vya kutolea chanjo vimeongezeka na kufikia vituo 45 kwa wilaya yote ya Kondoa.