CHONGOLO AWATAKA WAZAZI KUPELEKA WANAFUNZI SHULENI

Tarehe iliyowekwa: June 19th, 2023

Katibu Mkuu wa Chama Cha Mapinduzi Taifa Comrade Daniel Chongolo amewataka wazazi wa Wilaya ya Kondoa kupeleka watoto wao shuleni kusoma kwa kuwa wana uwezo wa kufanya vizuri na kulisaidia taifa.

Ameyasema hayo wakati wa mkutano wa  hadhara uliofanyika katika uwanja wa Stendi ya Zamani katika Halmashauri ya Mji Kondoa ikiwa ni sehemu ya ziara yake ya kutembelea mkoa wa Dodoma.

"Moja ya sifa ya nyie hapa Kondoa vijana wengi wana sifa ya kufanya vizuri kwenye namba yaani hesabu wanazijua kweli kweli wazuri pia kwenye uchumi kuanzia Mwenyekiti wenu wa mkoa, vijana wengi kichwa inachemka mkiwapeleka shule watakuwa na tija kwa nchi," amesema Ndg. Chongolo

Ameongeza kuwa wanakondoa wengi waliopelekwa shule ni viongozi wakubwa kwasasa ambao wapo kwenye kada mbalimbali ikiwemo jeshi la polisi, magereza na taasis za fedha na wengi wamekuwa wakifanya vizuri kazini kwa kuwa ni waaminifu.

"Watu wa Kondoa ni waaminifu ila watu wa Iringa tumewazidi kidogooo ila nawasihi uaminifu huo ugeuzeni kuwa bidhaa kwa kiwapeleka watoto wakapate elimu ili wakapate nafasi kubwa itakayokuwa na tija kwa familia na Kondoa kwa ujumla ikiwa ni pamoja na kuwapeleka watoto wa kike shuleni"amesisitiza Ndg. Chongolo

Akiongea kwa upande wake Mkuu wa Mkoa wa Dodoma Mhe. Rosemary Senyamule amesema mkoa umepokea shilingi bilioni 10.6 kwa ajili ya ujenzi wa miundombinu ya elimu lengo likiwa ni kuhakikisha kila mtoto anapata elimu.

"Tunamshukuru sana Rais Mhe. Dkt. Samia Suluhu Hassan kwa kutupatia fedha hizo na sisi kama mkoa tutahakikisha madarasa yanakamilika kwa wakati na yanatoa huduma iliyokusudiwa kwa jamii,"amesema Mhe. Senyamule 

Awali Mbunge wa Kondoa Mjini Mhe. Ally Makoa amemshukuru Rais Mhe.Samia Suluhu Hassan kwa fedha zilizoletwa katika Halmashauri ya mji Kondoa katika sekta za afya, elimu, barabara, kilimo na mifugo kwa kuwa inaonyesha namna anavyowajali wanakondoa.

"Kero kubwa kubwa iliyobakia ambayo tunaomba utusaidie ni daraja linaloitwa Munguri B watu wanapata shida na ni kero kubwa sana serikali ilitenga milioni 650 kwa bajeti tunayoendelea nayo na bajeti mpya imetengwa milioni 150 fedha hiyo bado ni ndogo na daraja lina umuhimu mkubwa kwa kuwa inaunganisha mkoa kwa mkoa inatokea Tanga, Bicha hadi Hanang,"amesisitiza Mhe. Makoa

Katibu Mkuu wa CCM taifa yupo katika ziara ya kukagua utekelezaji wa ilani katika mkoa wa Dodom ambapo amepata fursa ya kupitia miradi mbalimbali inayotekelezwa ndani ya mkoa.