Chuo Kikuu Mzumbe watoa elimu sheria za mazingira kwa Watendaji Kondoa Mji

Tarehe iliyowekwa: June 13th, 2025

Chuo Kikuu Mzumbe kupitia kitengo cha msaada wa kisheria jana kimetoa mafunzo ya kuwajengea uwezo Maafisa Mazingira wa Halmashauri ya mji Kondoa ili kuhakikisha wanapata kufahamu sheria za mazingira na namna ya utunzaji bora wa mazingira.

Mafunzo hayo yamefanyika katika ukumbi mdogo uliopo katika ofisi za Halmashauri ya Mji Kondoa.

Akifungua mafunzo hayo Mkurugenzi wa Halmashauri ya mji Kondoa Ndg.Said Majaliwa amesema mafunzo hayo ni muhimu kwa watendaji wake kwani ni vizuri wakafahamu sheria mbalimbali za mazingira ili kurahisisha utendaji wa kazi.

Akiongea wakati wa mafunzo Mhadhiri Msaidizi Ndg. Claudi Kilonzo amesema kuwa kutokana na changamoto kubwa za mazingira ndio chanzo Cha wao kuanza kutoa elimu ya mazingira ili kuhakikisha mazingira yanakuwa bora muda wote.

"Kukabiliana na mabadiliko ya tabia ya nchi ni ajenda kubwa ya Serikali, nawashukuru sana kwa kutuchagua Kondoa Mji kuja kutoa mafunzo haya ya kisheria kuhusu mazingira"

Maafisa hao wamejengewa uwezo wa namna ya kupambana na taka, namna ya utunzaji wa maeneo tengefu na vyanzo vya maji, Sheria zinazohusu mabadiliko ya tabia ya nchi, ukataji miti hovyo pamoja na ushirikishwaji wa jamii katika utunzaji wa mazingira.

Akiongea baada ya mafunzo Ndg. Aminaheri Mtambi ambaye ni Mtendaji wa Mtaa wa Maji ya Shamba amesema kuwa amejifunza umuhimu wa uhifadhi mazingira, kushirikiana na jamii katika namna ya uhifadhi na utunzaji wa mazingira pamoja na kutofautisha taka ngumu na taka nyepesi na namna ya kuziteketeza taka hizo.