DC MAKOTA: “Viongozi wa Elimu Kondoa wajibikeni katika kazi zenu”

Tarehe iliyowekwa: December 17th, 2019

Maafisa Elimu katika Halmashauri za wilaya ya Kondoa, Maafisa Elimu Kata na Walimu Wakuu katika Wilaya ya Kondoa wametakiwa kuwajibika kwa kazi walizoajiliwa nazo ili kuboresha elimu wilayani humo.

Hayo yamesemwa na Mkuu wa Wilaya ya Kondoa Mhe. Sezaria Makota katika kikao cha kujadili hali ya ufaulu katika matokeo ya darasa la saba kwa mwaka 2019 kilichofanyika katika ukumbi wa mikutano wa Kondoa Irangi hivi karibuni.

“Maafisa elimu mliopo halmashauri muwajali na kuwapenda walimu kwa kuhakikisha kuwa wanapata posho zao, likizo zao na kuwapandisha vyeo kwa wakati ili wawe na moyo wa kupenda kufundisha kutokana na mazingira yao,” alisema Mhe. Makota.

Aidha aliwataka baadhi ya watendaji hao kuacha kufanya kazi kwa mazoea na kuwaagiza Maafisa Elimu ngazi ya wilaya kuacha kukaa maofisini na badala yake wakafanye ukaguzi mashuleni kwani kwa kufanya hivyo hupelekea walimu kuwajibika.

“Mimi sifurahii hata kidogo kuanguka kwa Kondoa najisikia fahari ninapoona tunaongoza na napenda kufanyakazi na watu wanaowajibika na kupenda kufanyakazi kwani mafanikio yanapopatikana ni ya wote na si Mkuu wa Wilaya peke yake,”alisisitiza Mhe. Makota.

Hata hivyo alisikitishwa na baadhi ya changamoto zilizotolewa na wataalam wa Idara ya Elimu kuwa kushuka kwa ufaulu kumechangiwa na utoro na kutokujua kusoma na kuandika kwa wanafunzi ikiwa wao kama viongozi wapo hapo ili kuyadhibiti hayo hivyo akawataka kujipanga na kujirekebisha upya.

Kwa upande wake Mkurugenzi wa Halmashauri ya Mji Kondoa Msoleni Dakawa aliwataka viongozi hao kuwatia moyo walimu kwani wanafanya kazi katika mazingira magumu  na kwa kufanya hivyo watafarijika na kuona wanawajali.

“Serikali ya awamu tano imejitahidi sana kuhakikisha stahiki za walimu zinapatikana ikiwemo kuwapandisha walimu madaraja, kutoa fedha za likizo na kuboresha mazingira ya kufundishia kikubwa ni kuhakikisha kila mmoja anawajibika ili kufikia malengo,”alisema Mkurugenzi Dakawa.

Kikao cha tathmini ya matokeo ya matokeo ya darasa la saba kwa mwaka 2019 kiliandaliwa na Mkuu wa Wilaya na kilihudhuriwa na Kamati ya Ulinzi na Usalama, Maafisa Elimu ngazi ya Wilaya, Maafisa Elimu Kata na Walimu Wakuu wa shule zote za Msingi ndani ya Wilaya ya Kondoa.