DC Mkanachi awapongeza, awaonya Watendaji wa kata kusimamia lishe

Tarehe iliyowekwa: January 31st, 2024

Mkuu wa Wilaya ya Kondoa Mhe. Dkt. Khamis Mkanachi amewapongeza watendaji wa kata za Halmashauri ya Mji Kondoa waliofanya vizuri katika kusimamia masuala ya lishe katika maeneo yao huku akiwaonya watendaji wa kata zilizofanya vibaya kuboresha usimamizi wa masuala ya lishe kwa ukaribu.

Kauli hizo amezitoa wakati wa kikao cha tahmini ya lishe Halmashauri ya Mji Kondoa kujadili taarifa za kipindi cha Julai hadi Dsemba 2023 kilichofanyika katika ukumbi wa mikutano wa Halmashauri ya Mji hivi karibuni.

“Kila Mtendaji ni msimamizi wa kila kitu kwenye kata yake kwa kushirikiana na watendaji wake wa mitaa hatuwezi kukubali kubakia nyuma kwenye baadhi ya vitu na tulishaweka mikakati ya pamoja nawaomba tuisimamie ili changamoto hizi zisijirudie kwani hatutaki kuona rangi nyekundu wala njano kwenye kadi alama yetu na tunaweza,”amesema Dkt. Mkanachi

Aidha amewataka watendaji hao wajipime pamoja na watendaji wao wa mitaa kwa kuhakikisha kila mtoto anapata chakula shuleni kwa kuendelea kutoa elimu na kuwahamasisha wazazi kuchangia chakula ambapo pia aliwaagiza Maafisa Tarafa kuandaa ratiba yake kwenda kuzungumza na wazazi wa wanafunzi wa Halmashauri ya Mji Kondoa.

Hata hivyo aliwapongeza watendaji wa kata waliofanya vizuri kwa kipindi hicho tofauti na taarifa ya kipindi cha nyuma na kuwataka kwenda kufanyia kazi mapungufu yaliyoonekana katika taarifa zao walizowasilisha ili kila mtu awe na rangi ya kijani katika kadi alama ya kata yake.

Akiongea kwa niaba ya wengine Mtendaji wa Kata ya Kondoa Ndg. Samson Mtui ameomba radhi kwa kutofanya vizuri na kusema kuwa wameweka mpango mkakati wa kata kwa kushirikiana na wazazi ili kuhakikisha wanafunzi wote katika kata ya Kondoa Mjini wanapata chakula shuleni.

Kikao cha tathmini ya lishe Halmashauri ya Mji Kondoa kimefanyika kwa kujadili taarifa za kipindi cha Julai Desemba ambapo kilihudhuriwa pia na Mkurugenzi wa Halmashauri ya Mji Kondoa Ndg. Paul Sweya, Katibu Tawala Wilaya Ndg. Christina Kalekezi, Maafisa Tarafa, Watendaji wa Kata na Mganga Mkuu Halmashauri ya Mji Kondoa.