DC Mkanachi awapongeza watoa huduma Zahanati ya Kichangani

Tarehe iliyowekwa: March 20th, 2024

Mkuu wa Wilaya ya Kondoa Dkt. Khamis Mkanachi amewapongeza waoa huduma katika Zahanati ya Kichangani kwa namna wanavyotoa huduma kwa wananchi wengi kwa mwezi pamoja na uchache wao.

Pongezi hizo amezitoa alipofanya ziara katika kituo hicho kujionea hali ya utoaji huduma katika kituo hicho ambapo pia alitembelea kituo cha Afya Kingale na Zahanati ya Tampori hivi karibuni.

“Kuhudumia watu 700 kwa mwezi ni wengi sana hongereni sana inaonekana ni jinsi gani huduma zenu zinakubalika na kuaminika na wananchi maana ingekuwa tofauti wasingekuja hapa kwa kuwa zahanati ipo mbali na makazi ya watu endeleeni kutoa huduma kwa wananchi”amesema DC Mkanachi

Ameongeza kwa kuwataka wananchi wanaovamia maeneo ya zahanati kuacha mara moja na kumtaka Afisa Tarafa wa Kondoa Mjini Ndg. Ally Mbena kuonana na wananchi hao ili kujua sababu za kuvamia eneo hilo na kutafuta suluhu ya pamoja na eneo la zahanati kubaki salama.

Akisoma taarifa Mganga Mfawidhi wa ya zahanati Ngd. Husna Mlay ameiomba serikali kuwaongezea majengo ya kutolea huduma na kuongezewa watumishi pamoja na nyumba ya watumishi kumaliziwa ili watoa huduma wakae karibu na kituo na kutoa huduma wakati wote.

“Kituo chetu kinatoa huduma mbalimbali ikiwemo huduma za wagonjwa wa nje, wagonjwa wa msamaha hasa wazee wenye vitambulisho vya matibabu ya bure na wananchi wasio na uwezo wenye vibali na huduma ya mama na mtoto na tunapokea wagonjwa pia kutoka nje ya mtaa huu wa Kichangani,”amesema Mganga Mfawidhi.

Akiongea katika Zahanati ya Mulua ambayo ipo hatua za ukamilishaji baada ya kupokea shilingi milioni 25 kutoka Serikali Kuu amewataka wataalam wa Halmashauri kufanya kazi kwa kushirikiana hasa idara zote zinazohusika ili kuhakikisha taratibu za manunuzi zinafanyika kwa wakati na kazi ya umaliziaji kuendelea ili zahanati ianze kutoa huduma iliyokusudiwa kwa wananchi.

Ziara ya Mkuu wa Wilaya imefanyika kwa lengo la kujionea changamoto za vituo vya kutolea huduma ambapo pia ametembelea katika Kituo cha Afya Kingale,Zahanati ya Tampori na zahanati ya Mlua iliyopo katika ujenzi na mnada wa Bicha ameongozana na Wakuu wa Divisheni na vitengo kutoka Halmashauri ya Mji.