DC Mkanachi azindua chanjo ya Surua na Rubella

Tarehe iliyowekwa: February 13th, 2024

Mkuu wa Wilaya ya Kondoa Dkt.Khamis Mkanachi amezindua chanjo ya kitaifa ya surua na rubella kwa Halmashauri ya Mji Kondoa ikiwa ni zoezi linaloendeshwa nchi nzima.

Uzinduzi huo katika Wilaya ya Kondoa umefanyika katika Hospitali ya Mji Kondoa ambapo wakina mama wamejitokeza kwaajili ya kuhakikisha watoto wao wanapata chanjo hiyo.

Akiongea katika uzinduzi huo Dkt. Mkanachi amewataka wananchi wote wenye watoto wenye umri wa kuanzia miezi tisa hadi miaka mitano wanawapeleka watoto wao katika vituo vya afya ili wapate chanjo hiyo.

"Ndugu zangu magonjwa haya ni hatari sana kwa watoto wa umri huo kwani yanaweza kuwasababishia ulemavu hata vifo watoto wetu hivyo nawasihi wote kwa pamoja muwapeleke watoto wenu kwenye vituo vya afya na sehemu zilizotengwa watoto wakapate chanjo,"amesisitiza Dkt. Mkanachi.

Chanjo ya surua na rubella inatolewa nchi nzima kwa muda wa siku 4 kuanzia februari 15 hadi 18,2024 ambapo katika Halmashauri ya Mji Kondoa zaidi ya watoto elfu tisa wanatarajia kupata chanjo na Halmashauri ya Wilaya ya Kondoa zaidi ya watoto elfu arobaini wanatarajia kupata chanjo hiyo.