DC Nyangasa ahimiza ushirikiano na ukusanyaji wa mapato

Tarehe iliyowekwa: December 6th, 2025

Mkuu wa Wilaya ya Kondoa Mhe. Fatma Nyangasa amewataka Waheshimiwa Madiwani wa Halmashauri kufanya kazi kwa kushirikiana ili kuongeza ukusanyaji wa mapato.

Ameyasema hayo wakati wa mkutano wa kwanza wa baraza la Madiwani lililofanyika katika ukumbi wa mikutano wa Halmashauri ya Mji Kondoa.

"Tuna madiwani wapya na vijana naomba wazoefu tuwasaidie wenzetu kwa kuwa kwasasa tunaanza kazi rasmi tukaongeze mapato kwani kwasasa tunakaribia bilioni 3 tuongeze hadi bilioni 4"amesema Mhe. Fatma

Aidha ameongeza kwa kuwataka kufanya kazi kwa ushirikiano kwenye ukusanyaji kwa kubuni vyanzo vipya, kukusanya na kuziba mianya ya upotevu wa mapato.
Ameongeza kuhakikisha wanafuatilia jinsi huduma za kijamii zinavyotolewa ikiwa ni pamoja na kuhakikisha wanafuatilia na kusimamia miradi iliyopo katika maeneo yao ili kuhakikisha inakamilika na kutoa huduma kusudiwa kwa jamii.
"Pia tukumbuke kutenga maeneo kwa ajili ya uwekezaji kwa kuwainua wenye viwanda vya alizeti na kutafuta fursa zilizopo kwenye kata zetu na kama Serikali tupo pamoja  na nyinyi katika kufanikisha yote haya,"amesisitiza Mhe. Fatma

Akisoma taarifa ya utekelezaji wa shughuli za Halmashauri Mkurugenzi Ndg. Said Majaliwa amewaeleza Waheshimiwa Madiwani kuwa katika kipindi chote ambacho hawakuwepo Halmashauri imetekeleza shughuli zote kwa mujibu wa sheria na Halamshauri ipo salama.

" Mhe. Mwenyekiti kwa kipindi chote ambapo hamkuwepo Halmashauri imesimamia ukusanyaji wa mapato ambapo kwa mwaka wa fedha 2024/2025 imekusanya kwa asilimia 101, miradi mlioiacha imekamilika na mingine ipo hatua ya ukamilishaji lakini maagizo yote yaliyotolewa na Serikali yametekelezwa kwa asilimia 100,"amesema Mkurugenzi Majaliwa.