DKT.ASHATU AFUNGUA JENGO LA DHARURA KONDOA MJI

Tarehe iliyowekwa: April 29th, 2023

Waziri wa Viwanda, Biashara na Uwekezaji Mhe.Dkt.Ashatu Kijaji amefungua rasmi jengo la dharura kafika Hospitali ya Mji Kondoa ikiwa ni sehemu ya maadhimisho ya Muungano wa Tanganyika na Zanzibar.

Uzinduzi huo umefanyika katika Hospitali ya Mji Kondoa na kuhudhuriwa na viongozi mbalimbali wakiwemo Waheshimiwa Madiwani, Mwenyekiti na Katibu wa CCM wilaya, watumishi na wananchi.

Mhe. Dkt Ashatu ameupongeza uongozi wa Wilaya na Halmashauri kwa usimamizi wa miradi kwani kazi iliyofanyika inaonekana ambapo awali fedha zilikuwa zikiletwa lakini miradi ilikuwa haikamiliki.

"Maendeleo yanahitaji waru wenye afya bila hilo watu hawawezi kuleta maendeleo na ndicho alichofanya Mhe. Rais ameona ajenge  jengo hili pia ametoa ajira nyingi kwa watu wa elimu na afya ili waje kutoa huduma stahiki kwa wananchi,"amesema Dkt . Ashatu.

Aidha amesema kuwa zinapoletwa fedha kazi zifanyike kwa uadilifu na kutaka huduma itakayotolewa katika jengo hilo iendane na uzuri wa jengo ikiwa ni pamoja na kulitunza ili kuendelea kutoa huduma kwa vizazi yote.

"Wananchi tujitoe kwenye shughuli za maendeleo ili kuunga mkkno juhudi zinazofanywa na Serikali kwenye elimu, afya, maji na barabara na tujitafakari iwapo miaka 59 ya Muungano yanafanana na yaliyopo ndani mwako,"amesisitiza Dkt.Ashatu

Akiongea awali Mkuu wa Wilaya ya Kondoa Dkt. Khamis Mkanachi amesema kuwa viongozi ambao ni Hayati Mwalimu Julius Nyerere na Hayati Abeid Karume waliridhia nchi mbili ziungane kwa ajili ya kuwaletea maendeleo wananchi ambapo nao leo wanaendelea kuudumisha na wamefanya kwa kuanzia kuzindua miradi Halmashauri ya Wilaya ya Kondoa.

"Serikali imeleta fedha nyingi za maendeleo na hapa Hospitali ukiacha jengo hili kuna ujenzi unaendelea vizuri na ujenzi upo hatua ya umaliziaji na fedha zingine zitamalizia ukarabati na tunaendelea kusimamia ujenzi huo kwa kuhakikisha fedha iliyoletwa inakamilisha ujenzi na kwa viwango vinavyotakiwa,"amesema Dkt. Mkanachi

Naye mbunge wa Kondoa Mjini Mhe. Ally Makoa ameishukuru Serikali na Mhe. Rais Dkt.Samia Suluhu Hassan kwa kuleta fedha ambapo amesema zinafanya kazi vyema na kuushukuru uongozi wa CCM wilaya ya kushiriki katika miradi ya maendeleo.

Ufunguzi wa jengo la dharura katika Hospitali ya Mji Kondoa umefanyika baada ya jengo hilo kukamilika ambapo limetumia shilingi milioni 323 ambapo Serikali Kuu ilileta shilingi milioni 300 kwa ajili ya ujenzi na shilingi milioni 364 kwa ajili ya ununuzi wa vifaa vya kisasa na Halmashauri kupitia mapato ya ndani imetoa shilingi milioni 23 na imetoa huduma kwa wananchi 28 toka ianze kufanya kazi.