"Fanyeni kazi kwa bidii mradi ukamilike kwa wakati"- RC Senyamule

Tarehe iliyowekwa: March 24th, 2023

Vijana wanaofanya kazi ya ujenzi wa majengo matatu katika Hospitali ya Mji Kondoa wametakiwa kufanya kazi kwa bidii ili kukamilisha mradi kwa wakati na kutoa huduma kusudiwa kwa jamii.

Hayo yamesemwa na Mkuu wa Mkoa wa Dodoma Mhe. Rosemary Senyamule wakati akikagua ujenzi wa majengo hayo pamoja na viongozi mbalimbali wa mkoa na wilayani wakati wa ziara yake katika Wilaya ya Kondoa hivi karibuni.

”Vijana mnajua kuna changamoto ya ajira Mhe. Rais akileta fedha hizi faida kubwa mojawapo ni vijana kupata ajira kama nyie mlivyopata sasa mmesikia mradi huu unamwisho hautakiwi kuchukua muda mrefu kuukamilisha na nyie mpo site,”amesema Mhe. Senyamule

Aidha amewataka kufanya kazi kwa muda mrefu ili watumie muda mfupi unaobakia kupumzika hali itakayowasaidia kupunguza matumizi yasiyo ya lazima na kuhifadhi fedha zitakazowasaidia pia kutunza familia zao ikiwa ni pamoja na kwenda kuwaambia wenzao mambo mazuri yanayofanywa na serikali na faida walizopata kuwepo katika mradi huo.

Aidha Mkuu wa mkoa ameagiza vifaa vyote kwa ajili ya ujenzi viwepo eneo la ujenzi na kuachana na mazoea ya kununua vifaa kidogo kidogo kama zamani kwakuwa Mhe. Rais ameleta fedha zote za mradi na kutaka kuukamilisha mradi huo kwa wakati uliopangwa.

Akiongea kwa niaba ya vijana wengine Ndg. Joel Laizer amesema mradi huo umewasaidia kupata ajira inayofasaidia kujikwamua kiuchumi na kuwatengenezea mazingira mazuri ya kiafya kwa matumizi ya sasa na vizazi vijavyo.

Akisoma awali taarifa ya ujenzi wa mradi huo Mganga Mkuu wa Hospitali hiyo Dkt. Emiliana Donald amemshukuru Mhe. Rais kwa kuapatia fedha hizo za ukarabati a Hospitali ambapo kutokana na majengo ya awali kuwa katika hali hiyo iliwalazimu kuomba kibali cha kujenga majengo matatu ili fedha inayobakia ifanye ukarabati kwa majengo mengine.

“Mhe. Mkuu wa mkoa tumeanza na kujenga majengo matatu ambayo ni jengo la upasuaji, jengo la mama na mtoto na mochwari kwa kuwa ya awali yalikuwa katika hali mbaya ambapo yakikamilika yatasaidia sana katika kuboresha hali ya utendaji kazi katika hospitali yetu,”amesema Dkt. Emiliana

Ziara ya Mkuu wa Mkoa imefanyika wilayani Kondoa ambapo katika Halmashauri ya Mji Kondoa ametembelea katika Zahanati ya Mtaa wa Ausia na ujenzi wa Hospitali ya Mji Kondoa ambapo aliongozana na Kamati ya Ulinzi na Usalama mkoa na wataalam wa mkoani.