"Fanyeni kazi mjiletee maendeleo" - Mkurugenzi Kondoa Mji

Tarehe iliyowekwa: February 13th, 2020

Wananchi wa Mtaa wa Chemchem katika kata ya Chemchem Halmashauri ya Mji Kondoa wametakiwa kufanyakazi na kujiletea maendeleo ya Mtaa huo kwani maendeleo ya Mtaa huo yataletwa na wananchi wenyewe na serikali ikitekeleza miradi mikubwa.

Hayo yalisemwa na Mkurugenzi wa Halmashauri ya Mji Kondoa Msoleni Dakawa wakati wa mkutano wa mtaa huo wa kusikiliza kero za wananchi uliofanyika katika viwanja vya Ofisi ya Kata ya Chemchem hivi karibuni.

“Maendeleo ya Kondoa yataletwa na wanakondoa wenyewe na maendeleo ni gharama yanahitaji kujitoa kuanzia ngazi ya mtaa hivyo mkae na viongozi wenu muone jinsi ya kuongeza vyanzo vya mapato ya mtaa ili muweze kufanya maendeleo makubwa katika mtaa wenu,”alisema Mkurugenzi Dakawa.

Aliongeza kwa kuwashauri wananchi kushirikiana na viongozi wa Mtaa huo kwani kwa kufanya hivyo amani itapatikana na kupata maendeleo.

“Mapato yote yanaingia Halmashauri ila baadaye hugawanywa kwa mujibu wa Sheria na katika mgawanyo huo kuna asilimia 20 ambayo huwa inakuja katika mitaa yenu lakini kwa kuwa makusanyo ni madogo na mgao huwa mdogo ambapo fedha hizo ndizo zinasaidia katika kununua vitendeakazi vya ofisi sasa ili tupate mgao mkubwa tuongeze kasi ya ukusanyaji wa mapato ili tufanye mambo makubwa zaidi,”alisisitiza Mkurugenzi Dakawa.

Akiongea katika mkutano huo Mwenyekiti wa Halmshauri ya Mji wa Kondoa Mhe. Hamza Mafita aliwapongeza viongozi wa Mtaa kwa kuchaguliwa na kumshauri Mwenyekiti wa Mtaa wa Chemchem kuwapangia kazi za kufanya wajumbe wa serikali ya Mtaa waliochaguliwa ili kuwaletea maendeleo wananchi wa Mtaa wa Chemchem.

“Kazi mliyopewa viongozi ni ngumu na ya kujitolea hivyo inatakiwa muelewane na kumaliza matatizo yenu na mfike mbali na nakushauri Mwenyekiti kuwaachia watendaji na wajumbe kushughulikia masuala ya fedha ili wewe ubaki kuwa msimamizi wa hawa wote,”alishauri Mhe. Mafita.

Aidha Mhe. Mafita alitoa taarifa ya kuanza kujitegemea kama Halmashauri katika program ya kusaidia kaya maskini TASAF kuanzia mapema mwezi Julai ambapo Halmashauri imetengewa zaidi ya shilingi bilioni 2 na kwasasa inaratibiwa na Halmashauri ya Wilaya ya Kondoa.

Diwani wa Kata ya Chemchem Mhe. Kipaya Mdachi aliwasihi viongozi na wananchi kuilinda amani na kupendana ikiwa ni pamoja na kuepuka majungu, zaidi washirikiane kufanya kazi kwa pamoja kwani hakuna binadamu aliyekamilika.

Wakitoa kero zao katika nyakati tofauti wananchi wa mtaa huo waliiomba Serikali kuwasaidia kuwatengenezea barabara katika kiwango cha changarawe, kupata maji safi na salama na kuwekewa taa za barabarani katika eneo la barabara ya Magereza hadi Hospitali kwani linahatarisha usalama wao nyakati za usiku.