FFARS Yaongeza Kasi Ya Utendaji Kazi KONDOA GIRLS

Tarehe iliyowekwa: April 3rd, 2018

Uwepo wa mfumo wa masuala ya utoaji ripoti za fedha na mahesabu katika Shule ya Wasichana Kondoa umeongeza hali ya utendaji kazi kwa walimu tangu kuanza kutumika kwa mfumo huo mapema Julai mosi 2017.

Hayo yamesemwa na Makamu Mkuu wa Shule Mwalimu Khalifa Kinasha alipokuwa akiongea ofisini kwake juu ya hali ya utendaji kazi wa mfumo huo toka ulipoanza kutumika shuleni hapo.

’’Kwa kweli mfumo huu umeongeza uzalendo sana kwa walimu kwani umeturahisishia sana kazi ya kuandaa taarifa za fedha tofauti na awali ambapo ilibidi mhasibu atumie muda mwingi  kuandaa taarifa ya fedha na kusimamisha kazi zingine kwani shuleni hapa tunatumia mwalimu ambapo kwasasa anatumia muda mfupi na kuendelena kazi ya kufundisha.”Alisema Kinasha.

Aliongeza kwa kuipongeza serikali kwa ubunifu wa mfumo huo ambao pia umewafanya waendelee kujifunza kompyuta kwa ukaribu zaidi hali inayowafanya waendane na kasi ya ukuaji wa teknolojia unaoendelea duniani.

Hata hivyo aliishauri serikali kuendelea kubuni mifumo mingine mizuri ili kupunguza tatizo la kuwa na takwimu tofauti na hali halisi mashuleni hasa za walimu na wanafunzi hali ambayo pia itapunguza kwa kiasi kikubwa migogoro kati yao na viongozi kwani watakuwa na takwimu sawa.

Kwa upande wake Kaimu Mhasibu wa shule Mwalimu Mustafa Nkondokaya aliongeza kuwa kwake mfumo huo umekuwa ni msaada mkubwa sana kwani amekuwa akiandaa taarifa ya fedha kwa umakini na uhakika zaidi tofauti na awali ambapo taarifa zilikuwa zinatofautia wakati wa uandaaji.

Aliendelea kueleza kuwa mfumo pia umemsaidia wakati wa kuandaa malipo kwani hujua chanzo cha fedha moja kwa moja na kumlazimisha kutumia fedha kwa nidhamu kulingana na bajeti iliyopangwa ambapo awali alikuwa akitumia fedha bila kujua chanzo na bila kufuata bajeti na kupelekea shule kutumia fedha nyingi bila sababu.

“Mfumo umenirahisishia kazi pia ya utunzaji wa kumbukumbu za taarifa ya fedha na kunifanya niweze kuangalia salio la benki popote nilipo na kwa wakati wowote hivyo napata muda mwingine wa kuendelea na majukumu mengine ya ufundishaji.” Mustafa

Aidha alifafanua zaidi kuwa uwazi umeongezeka katika masuala ya fedha kwani ngazi mbalimbali wanaweza kuangalia mfumo mzima wa makusanyo na matumizi ambapo awali iliwalazimu kwenda kupeleka taarifa hizo kwa gharama zinapohitajika na hali hii imepunguza ubadhilifu kwa kiasi kikubwa kwa watumishi wasio waaminifu.

Mfumo wa masuala ya utoaji wa ripoti za fedha na mahesabu ulianza kutumika Julai 2017 kwenye zahanati, vituo vya afya, hospitali na mashuleni ili kuboresha masuala ya fedha kwa kutumia mfumo wa kielektroniki.