"Fuateni Sheria na Alama za barabarani" - Dkt. Mahenge

Tarehe iliyowekwa: September 30th, 2018

Mkuu wa mkoa wa Dodoma Dkt. Binilith Mahenge amewataka madereva mkoani wote katika mkoa wa Dodoma kufuata sheria na kuheshimu alama za barabarani ili kuepukana na ajali zisizo za lazima.

Aliyasema hayo katika hospitali ya Mji  Kondoa baada ya kuwatembelea majeruhi wa ajali ya basi la kampuni ya Emigrace lenye namba za usajili T 550 DFU lililokuwa likitokea Babati kuelekea Dar Es Salaam ajali iliyotokea mapema leo katika eneo la Kolo kwa Dino.

Amesema kuwa kufuata sheria na kanuni za barabarani zitasaidia kuwaepusha na ajali kwa kuwa chombo hakisemi na kuwasihi kufanya maamuzi sahihi kunapotokea hitilafu zozote katika chombo ili kuokoa maisha ya abiria.

“Ajali hii inaonekana dereva hakuwa na mwendo mkali ila alichelewa kufanya maamuzi ya kulikwepesha gari katika eneo salama na kupelekea abiria kuumia na jeshi la polisi linafanya uchunguzi wote waliohusika kusababisha ajali sheria zichukuliwe dhidi yake.”Alisema Dkt. Mahenge

Aidha alimwagiza kamanda wa polisi wa wilaya ya Kondoa kuweka trafiki katika eneo hilo lenye mteremko na kona kali ili kukagua magari yanayopita hapo na kuokoa maisha ya abiria na mali zao na kuwashukuru kamati ya ulinzi na usalama wakiongozwa na Mkuu wa Wilaya na watumishi wa hospitali ya Mji kwa ushirikiano waliouonyesha katika kuokoa maisha ya abiria hao.

Akiongea Mkuu wa wilaya Mhe. Sezaria Makota alimwomba Mkuu wa mkoa kusaidia upatikanaji wa fedha za kujenga Kituo cha Afya Kolo na chumba cha wagonjwa mahutiti katika hospitali ya mji ili kuokoa maisha ya wanaopata ajali kwani ajali nyingi zinatokea katika eneo hilo.

Naye Mganga Mfawidhi wa Hospitali ya Mji Kondoa Dkt. Florence Hilary alisema kuwa walipokea majeruhi 35 ambapo majeruhi 10 waliruhusiwa, 25 wamelazwa na wagonjwa 8 wapelekwa katika hospitali ya mkoa wa Dodoma kwa matibabu zaidi.