Hachwi watakiwa kuacha tofauti ujenzi wa Zahanati

Tarehe iliyowekwa: December 23rd, 2020

Wananchi wa mtaa wa Hachwi katika Halmashauri ya Mji Kondoa wametakiwa kuacha tofauti zao katika utekelezaji wa miradi ya maendeleo kwani kwa kufanya hivyo wanachelewesha upatikanaji wa huduma muhimu kwa wananchi.

Hayo yamesemwa na Kaimu Mkurugenzi Hassan Kiseto wakati wa mkutano wa wananchi kuhusu ujenzi wa Zahanati ya Mtaa huo uliofanyika katika ofisi za mtaa wa Hachwi hivi karibuni.

"Mradi huu ulitakiwa uwe umeshaanza toka kitambo fedha zipo kwenye akaunti shilingi milioni 50 kwa ajili ya ujenzi wa zahanati hapa lakini ujenzi haujaanza kwa kuwa mnavutana  eneo la kujenga zahanati siyo sawa tunataka kuona kazi inaanza ili lengo la  serikali la kuona huduma zinasogezwa karibu kwa wananchi linatimia," amesema Kiseto

Aidha ameongeza kuwa kwa kuwa wananchi wote wanavutana juu ya eneo la kujenga zahanati ni wazi kuwa wote wanahamu ya kupata maendeleo na kuwaagiza wananchi hao kujenga jengo la Zahanati ilipokuwa zahanati ya awali na wengine kujenga nyumba mbili za watumishi kwa ajili ya kituo cha afya katika eneo lilipo shamba la mtaa.

Akiongea awali diwani wa kata ya Kolo Mhe. Idd Ng'ungu amesema wananchi wa mtaa huo wananeema ya kupata miradi kwani hadi sasa wamepewa miradi minne muhimu kwa mwananchi hao ambayo ni usambazaji wa maji, ujenzi wa madarasa na nyumba ya mwalimu shule shikizi ya Kotumo, ujenzi wa Zahanati ya Hachwi na ufunguzi wa barabara.

Akielezea tatizo lililochelewesha kuanza kwa mradi huo Mtendaji wa Mtaa wa Hachwi Judith Mkumbwa amesema mvutano ulianza  baada ya wananchi ya baadhi ya wananchi kutaka zahanati ijengwe eneo la shamba la wananchi na kupelekea wananchi kuanza kusita kuchangia mchango wa shilingi elfu 10 waliokubaliana.

Kwa upande wao akina mama na baadhi ya wananchi wameomba Zahanati ijengwe ilipokuwa zahanati ya awali kwa lengo la  kuhakikisha wananchi wa maeneo yote ya mtaa wa Hachwi wanafika kwa urahisi zahanati kwa ajili ya kupata huduma za afya.

"Wakina mama sisi ndio tunaoteseka sana katika zahanati yetu hii ya awali tumekuwa tukipata huduma ya mama na mtoto na hapa ni karibu kwa kila mtu lakini kwasasa inatulazimu kukodisha pikipiki hadi hospitali ya wilaya lakini tumeletewa fedha za kujenga zahanati hapa karibu alafu eti tunataka kuipeleka kule mbali tena tutarudisha gharama zilezile za kukodisha pikipiki nashauri mtusaidie ijengwe hapahapa ili kila mtu apate huduma kwa ukaribu,"amesema mmoja wa akina mama.

Mkutano wa uhamasishaji ujenzi wa zahanati ya Hachwi umekuja kwa lengo la kutatua changamoto ya mvutano uliokuwepo awali wa kuchagua eneo la kujenga Zahanati baada ya serikali kutoa shilingi milioni 50 ambapo wataalam mbalimbali wa halmashauri walihudhuria wakiwemo Mwanasheria, Afisa Maendeleo ya Jamii, Kaimu Afisa Mipango, Kaimu Afisa Utumishi, Kaimu Mhandisi, Kaimu Mganga Mkuu na Kaimu Afisa Elimu.