Halmashauri ya Mji Kondoa kusimamia kesi za ukatili wa kijinsia zinazocheleweshwa maamuzi

Tarehe iliyowekwa: December 4th, 2020

Idara ya Maendeleo ya Jamii Halmashauri ya Mji Kondoa imejipanga kusimamia kesi za ukatili wa kijinsia walizofanyiwa wakazi wa Halmashauri hiyo ili kuhakikisha haki inatendeka kwa waliofanya vitendo hivyo.

Hayo yamesemwa na Bi. Irene Mosha Mkuu wa Idara ya Maendeleo ya Jamii wakati wa utoaji elimu ya ukatili wa kijinsia kwa wanafunzi wa Shule ya Msingi Bolisa na wananchi wa mtaa wa Msui hivi karibuni.

"Naomba wananchi wote ambao mna kesi za ukatili wa kijinsia ambazo hazijashughulikiwa mziorodheshe na kuziwasilisha ofisini ili nizifikishe polisi kwa ajili ya msaada zaidi lengo ni kukomesha vitendo hivi katika jamii yetu," amesema Irene

Aidha aliwasihi wanafunzi kutoa taarifa kwa walimu wao wakuu au uongozi wa mtaa mara wanapofanyiwa vitendo vya ukatili ili wahusika wachukuliwe hatua kwani huwasababishia maumivu wanafunzi hao na kuwarudisha nyuma kitaaluma.

Naye Mwalimu Mkuu Msaidizi katika Shule ya Msingi Bolisa Bi. Victoria Mwidunda amesema katika shule yake mwanafunzi mmoja alipigwa na mama yake wa kambo na kupata majeraha ambapo walisaidiana na kuhakikisha mtuhumiwa anakamatwa na kufikishwa katika vyombo vya sheria na kwasasa anatumikia kifungo gerezani.

Hata hivyo mmoja wa wanafunzi ameshukuru kwa kupatiwa elimu hiyo na kuahidi kutoa elimu kwa watu wengine na kutoa taarifa mara tu watapofanyiwa ukatili ili kukomesha vitendo hivyo.

Utoaji elimu ya ukatili wa kijinsia umefanyika ikiwa ni sehemu ya maadhimisho ya siku 16 za kupinga ukatili wa kijinsia ambapo Halmashauri imeshirikiana na wadau CCT ambao wametoa elimu na kugawa vipeperushi kwa washiriki waliojitokeza katika kata ya Kingale na Bolisa na mwaka huu kauli mbiu inasema Tupinge ukatili wa kijinsia: Mabadiliko yanaanza na wewe"