Halmashauri ya Mji Kondoa Yajivunia Mafanikio katika sekta zake

Tarehe iliyowekwa: June 5th, 2018

Halmashauri ya Mji Kondoa imejivunia mafanikio waliyoyapata katika sekta zake mbalimbali ikiwemo Elimu, Afya, Kilimo, Mfuko wa Maendelo ya Jamii na Mazingira.

Hayo yamebainika wakati wa baraza la kazi lililofanyika katika ukumbi wa Kondoa Irangi hivi karibuni.

Akiongea Mwenyekiti wa Halmashauri ya Mji Kondoa Mhe. Hamza Mafita amesema kuwa kwa upande wa elimu Msingi Halmashauri imeongoza kwa kushika namba moja kwa matokeo ya darasa la saba mwaka 2017 na kupata kikombe ambapo aliahidi kuendelea kuishikilia nafasi hiyo kwa miaka yote kwani nafasi hiyo wanaishikilia kwa mwaka wa pili mfululizo na kuongeza asilimia za ufaulu.

“Katika upande wa elimu Sekondari tumekuwa nafasi ya tatu kimkoa nafasi ambayo hatupaswi kuishikilia kutokana na kuwa na shule chache na tuna uwezo wa kufanya vizuri zaidi lakini tumeshaweka mikakati ya kushika nafasi ya kwanza na naamini tutafanya vizuri sababu tumeshafanya vikao na wazazi, kamati za shule na walimu ambapo tuliweka mkakati wa wanafunzi wote wenye mitihani kukaa hosteli kwa kipindi cha wiki mbili.”Alisema Mhe. Hamza

Aidha aliipongeza kata ya Chemchem kwa kuendelea kufanya vizuri katika matokeo ya mtihani wa darasa la saba na kushika nafasi ya 3 kimkoa ambapo juhudi zimekuwa zikifanywa na Mhe. Diwani wa kata hiyo hivyo ni vizuri walimu na waheshimwa madiwani wengine wakatumia mbinu hizo ili kuinua kiwango cha ufaulu wa shule za halmashauri nzima .

Akiongea kwa upande wa kilimo Afisa Kilimo, Umwagiliaji na Ushirika  Bwana Hassan Kiseto amesema kuwa Halmashauri imeshika nafasi ya kwanza katika uhifadhi wa chakula kwa kutumia teknolojia za kuhifadhi chakula kwa kutumia mifuko maalum na mapipa bila ya kutumia sumu ambapo utafiti uliofanyika umeonyesha wananchi wa Kondoawameelewa kwa kiasi kikubwa teknolojia hiyo.

Akifafanua pia Meneja CHF  Bwana Mwinyikombo Ally amesema kuwa Halmashauri imeongoza kwa mkoa wa Dodoma katika usajili wa wanachama wa CHF ambapo hadi sasa Halmashauri imefikia asilimia 32 na wananchi waliokuwa hai ni asilimia 17 hali iliyopelekea Halmashauri kupata wageni kutoka sehemu mbalimbali ikiwemo nchini Uswiswi kuja kuulizia mbinu ambazo Halmashauri imefanya hadi kufikia kiwango hicho.

Akiongelea mafanikio katika Idara zingine Mkurugenzi Mji Khalifa Kondo alisema kuwa Halmashauri pia imeshika nafasi ya kwanza kwa usafi wa Mazingira kimkoa na kupewa cheti cha pongezi katika usimamiaji wa bajeti na ufuatiliaji wa miongozo ya matumizi ya fedha za  Afya Halmashauri imekuwa ya tatu kitaifa na ya kwanza kimkoa na kuepelekea kuwa Halmashauri pekee katika mkoa kuongezwa bajeti ya miradi ya afya.

“ Lakinii pia kwenye miradi ya maji mkoa mzima ni Halmashauri pekee iliyoweza kusimamia, kubuni na kuiendesha miradi ya maji, kama mnavyojua katika bajeti ya maji ya mwaka 2017/2018 tulikuwa na shilingi milioni 60 tu lakini kwa ubunifu wetu tumeweza kupata fedha zaidi ya shilingi tatu na miradi inaendelea vizuri na itakamilika kwa wakati” alifafanua Kondo.

Baraza la kazi limefanyika kwa kuwashirikisha wakuu wa Idara, Waheshimiwa madiwani ikiwa ni maandalizi ya kikao cha baraza la madiwani ambapo imeelezwa mafanikio hayo yamefikiwa kutokana na ushirikiano mzuri kati ya waheshimiwa madiwani na watendaji.