"Hongereni kwa kumaliza kazi kwa wakati"- Mhe.Hamza

Tarehe iliyowekwa: June 10th, 2018

Mwenyekiti wa Halmashauri ya Mji Kondoa Mhe. Hamza Mafita amewapongeza wakandarasi wanaotekeleza miradi ya usambazaji wa miundombinu ya maji Kondoa Mjini kwa kukamilisha miradi hiyo kwa kiwango cha hali ya juu na wakati.

Alizitoa pongezi hizo wakati wa ziara ya ukaguzi wa miradi ya maji hiyo uliofanywa na kamati ya Fedh, kamati ya Miundombinu na Mazingira na wataalam wa Halmashauri iliyofanyika hivi karibuni.

“Miradi imeenda vizuri na imekamilika kwa asilimia 95 vimebakia vitu vidogovidogo kwa ujumla wamefanya vizuri tunawapongeza Sana na wameenda na muda ambao tuliwapangia isipokuwa kampuni moja ambayo ipo asilimia 70 ya kazi.”Alisema Mhe.Hamza

Aidha aliwataka wananchi kusubiria makabidhiano ya miradi kutoka kwa wakandarasi na wao kama Halmashauri wataona ni njia gani bora ambayo wataweza kufikisha huduma hiyo kwa wananchi na kuongeza kuwa katika baadhi ya maeneo ambayo maji yanatoka ni majaribio yanayofanywa na wakandarasi ambapo wameona majaribio ni mazuri kwani hakuna mivujo na maji yana kasi kubwa.

Hatahivyo aliipongeza serikali ya awamu ya tano inayoongozwa na Rais Dkt.Jonh Magufuli kwa kuwapatia fedha zote za kutekeleza miradi hiyo ya maji zaidi ya shilingi bilioni tatu na Halmashauri imejitahidi kuisimamia na imefanya vizuri na kuikamilisha kwa wakati na kuongeza kuwa wametuma tena serikalini maombi ya shilingi bilioni tatu zingine kwaajili ya ukarabati wa miundombinu ya maji ya zamani na wana imani ombi hilo litakubaliwa.

Ziara ya ukaguzi wa miradi ya maji imefanyika kwa lengo la kujionea na kujiridhisha na utekelezaji wake ambapo miradi hiyo imeanza kutoa maji kwa wananchi ikiwa ni majaribio yanayofanywa na wakandarasi wanaotekeleza miradi hiyo ambapo wananchi wa Kilimani,Tura,Kichangani, Kwapakacha na Unkuku wameanza kufaidika na huduma hiyo.