Jazeni "OPRAS" Mpande Madaraja - Dakawa

Tarehe iliyowekwa: January 16th, 2019

Mkurugenzi wa Halmshauri ya Mji wa Kondoa Msoleni Dakawa amewataka watumishi wa halmshauri kujaza fomu za utendaji kazi (OPRAS) ili kupanda madaraja kwani fomu hizo zinasaidia kuonyesha utendaji kazi wa mwaka mzima wa mtumishi

Ameyasema hayo wakati akifungua mafunzo kwa maafisa elimu kata, wakuu wa shule na walimu wakuu ya jinsi ya kujaza fomu hizo katika ukumbi wa Embeko Kondoa Mjini hivi karibuni.

“Ujazaji wa Opras ulianzishwa ili kufuta mazoea na upendeleo katika ofisi za serikali uliokuwepo hapo awali hasa wakati wa kuwapandisha madaraja ya mishahara  watumishi kwani watu walikuwa wanawapandisha watumishi kwa upendeleo na kuwaacha wanaofanya kazi.” Alisema Dakawa

Aliongeza kuwa ili kuondoa hali hiyo serikali ilianzisha utaratibu wa kutumia Opras ambazo hujazwa na kila mtumishi na kupimwa na msimamizi wake kulingana na majukumu na malengo aliyojiwekea na huwezi kupanda daraja hadi utakapojaza Opras.

Hata hivyo aliwataka viongozi hao kusikiliza kwa makini mafunzo hayo ili wakawafundishe vizuri wanaowasimamia mapema iwezekanavyo ikiwa ni mwanzoni mwa mwaka ili kufikia malengo yaliyokusudiwa na taasis.

Aidha alitumia nafasi hiyo kuwaasa viongozi hao kutekeleza miradi ya maendeleo kwa kufuata sheria, kanuni na taratibu za serikali ili kuepuka kukwamisha miradi hiyo kama ilivyotokea kwa baadhi ya viongozi ambao wamechukuliwa hatua na ni jambo ambalo halipendezi kiutumishi.

“Mkikiuka miongozo ya kazi zenu wakati wa kutekeleza kazi zenu mtafungwa na nawasihi msisite kuuliza mnapokwama na nawasihi fanyeni kazi kwa kushirikiana na viongozi wa ngazi zote kuanzia vitongoji na nawahakikishia hamtakwama katika kutekeleza majukumu yenu.”

Mafunzo ya ujazaji wa fomu za utendaji (OPRAS) yatafanyika kwa siku mbili na yamehudhuriwa na maafisa elimu kata, wakuu wa shule na walimu wakuu ambapo nao watakwenda kuwafundisha walimu wanaowasimamia ikiwa ni baada ya maboresho ya fomu hizo ambapo kwasasa walimu watajaza kulingana na kazi zao za kila siku kwa kumlenga mwalimu hadi wa darasani.