Kamati ya Fedha na Utawala yakagua miradi ya Bilioni 1.9

Tarehe iliyowekwa: January 22nd, 2025

Kamati ya Fedha na Utawala Halmashauri ya Mji Kondoa imefanya ziara ya ukaguzi wa miradi inayoetekelezwa yenye thamani ya zaidi ya shilingi bilioni 1.9 ikiwa ni fedha kutoka Serikali Kuu, Wahisani na mapato ya ndani.

Wakiongea kwa nyakati tofauti Waheshimiwa Madiwani wameipongeza Serikali ya awamu ya sita kwa kuwaletea fedha nyingi za utekelezaji wa miradi ya maendeleo ambayo itawasaidia kwa kiasi kikubwa kutatua changamoto zinazowakabili wananchi.

“Tumeagiza wasimamizi wa miradi inayotekelezwa kuendelea kuwa karibu zaidi na miradi hii sababu tunahitaji kuona thamani ya fedha zilizoletwa na Mheshimiwa Rais Dkt. Samia Suluhu Hassan,”amesema Mhe.Mohamed  Kiberenge Mwenyekiti wa Halmashauri ya Mji Kondoa

Aidha wajumbe wengine wameshauri miradi kukamilika kwa wakati na ubora na katika ukaguzi wao wameona kazi zimefanyika vizuri ambapo majengo yapo katika hali znuri hivyo jukumu lao ni kuhamasisha wananchi ili wanafunzi waende shuleni kujifunza na kuleta tija ya miradi hiyo.

Kwa upande wake Mkurugenzi wa Halmashauri ya Mji Kondoa Ndg. Said amewahakikishia wajumbe kuwa ataendelea kusimamia ili kazi zizidi kuendelea vizuri na kukamilisha kwa wakati kwa kushirikiana na wasimamizi wote wa miradi.

Miradi iliyotembelewa ni pamoja na mradi wa ujenzi wa shule ya amali wenye thamani ya shilingi milioni 544,225,626, mradi wa ujenzi wa Shule ya Sekondari Suruke wenye thamani ya shilingi milioni 544,225,626, ujenzi wa madarasa matatu na matundu 6 ya vyoo wenye thamani ya shilingi milioni 81,600,000, mradi wa umaliziaji wa zahanati ya Mulua na ujenzi wa choo wenye thani ya shilingi milioni 7.

Miradi mingine ni ujenzi wa madarasa 8 na matundu 8 ya vyoo katika Shule ya Sekondari Tura Day wenye thamani ya shilingi milioni 198,400,000, ujenzi wa madarasa sita, mabweni 2 na matundu ya vyoo kumi katika Shule ya Sekondari Gubali kwa thamani ya shilingi milioni 405,000,000, ujenzi wa madarasa matatu na matundu sita ya vyoo katika Shule ya Msingi Unkuku kwa tahami ya shilingi milioni 81,600,000 pamoja na umaliziaji wa nyumba ya mkurugenzi baada ya kupokea shilingi milioni 50.

Ziara ya ukaguzi wa miradi imefanyika ikiwa ni kwa robo ya pili ambapo wajumbe wa kamati ya fedha pia waliongozana na wataalam kutoka idara za Elimu Msingi, Sekondari, Afya. Manunuzi, Ukaguzi wa ndani, Ujenzi na Mipango.