Kamati za Ujenzi zatakiwa kukamilisha ujenzi wa Zahanati

Tarehe iliyowekwa: January 25th, 2023

Kamati zinazosimamia miradi ya ujenzi wa zahanati mtaa wa Ausia na Mulua wametakiwa kuongeza nguvu katika usimamizi wa ujenzi wa zahanati hizo ili zikamilike na kutoa huduma kwa wananchi.

Hayo yamesemwa na wajumbe wa kamati ya Fedha na Utawala wakati wa ziara ya ukaguzi wa miradi iliyofanyika hivi karibuni.

"Simamieni vituo vianze kufanyakazi wananchi wapate huduma tunapochelewa tunajichelewesha wenyewe na kuwatesa wananchi wanaotembea umbali mrefu kupata huduma,"amesema Mwenyekiti wa Halmashauri ya Mji Mhe. Mohamed Kiberenge

Ameongeza Mhe.Kiberenge kwa kuwaeleza wanakamati hao kiwa zahanati hizo lazima zikamilike na Halmashauri italeta fedha za ukamilishaji kadiri wanavyokusanya mapato na kipaumbele kitakuwa kwa zahanati hizo.

Aidha wajumbe hao wametoa angalizo kwa kamati hizo kutofanya malipo kwa mafundi nje ya mkataba kwani kwa kufanya hivyo ni kinyume na taratibu ambazo zinamtaka fundi kujenga kwanza ndipo malipo yafuate.

Hata hivyo wameipongeza kamati ya mradi wa Mlua kwa hatua waliyofikia na kuwataka kumsimamia fundi anayeendelea na kazi kumaliza kazi iliyobakia ndani ya wiki moja.

Ziara ya Kamati ya fedha na Utawala imefanyika ikiwa ni kwa ajili ya kukagua miradi kwa robo ya pili ambapo imepitia miradi ya ujenzi wa zahanati ya Ausia, Mlua ambao walipewa shilingi milioni 50 kila zahanati na zipo hatua za ukamilishaji ikiwa ni pamoja na kutembelea miradi ya ujenzi wa kituo vha Afya Kolo na ukarabati shule ya Msingi Kolowasi.