Kondoa Islamic wapewa kongole kuinua taaluma

Tarehe iliyowekwa: November 22nd, 2019

Uongozi wa Shule za Kondoa Islamic umepongezwa kwa usimamizi mzuri na mshikamano walionao na kupelekea shule hizo kufanya vizuri kitaaluma kwa ngazi ya kitaifa, kimkoa na kiwilaya.

Pongezi hizo zilitolewa na Mkurugenzi wa Halmashauri aya Mji Kondoa Msoleni Dakawa akiwa mgeni rasmi katika mahafali ya saba ya kidato cha nne yaliyofanyika katika viwanja vya shule hizo hivi karibuni.

“Pongezi pia kwa kupata usajili wa shule ya awali ambapo mmedhihirisha kuwa mnafanya vizuri kwa jinsi watoto walivyoonyesha umahiri wao katika kuongea lugha ya kiingereza na usomaji wa Kurani,”aliongeza Mkurugenzi Dakawa.

Aidha aliwashauri kutosita kushirikiana na Ofisi ya Mkurugenzi wanapokuwa na jambo lolote la kuboresha elimu kwani wao ni wadau wakubwa katika kuinua elimu ndani ya wilaya, mkoa na taifa kwa ujumla.

“Mmeweka mkakati wa kujenga Chuo ni vizuri na itasaidia kwa kiasi kikubwa watoto wanaoshindwa kuendelea na kidato cha tano na sita ambapo wakihitimu watasaidia katika kuiendeleza jamii ya Kondoa kwa kuwa mtazalisha vijana wengi wenye ujuzi mbalimbali,”alisisitiza Mkurugenzi Dakawa

Hata hivyo aliwashauri wazazi kuwawezesha watoto wao na kuwaonyesha upendo ili wamalize salama masomo yao kwani elimu ndio urithi pekee kwa mtoto.

Awali akisoma risala kwa niaba ya wanafunzi wenzake waliomaliza kidato cha nne Ally Adinani alisema shule ina malengo ya kuanzisha kidato cha tano, sita na chuo japokuwa wana changamoto ya kompyuta na chumba cha kompyuta.

Shule ya Sekondari Kondoa Islamic ilianzishwa mwaka 2010 ikiwa na wanafunzi 17 na kwa sasa ina jumla ya wanafunzi 640 ambapo kwa mwaka 2019 ni mahafali ya 7 na jumla ya wanafunzi 182 wamehitimu kidato cha nne kwa mwaka 2019.