Kondoa Mji wapewa kongole kwa hati safi miaka mitatu mfululizo

Tarehe iliyowekwa: June 19th, 2019

Halmashauri ya Mji wa Kondoa imepongezwa kwa kupata hati safi kwa miaka mitatu mfululizo tangu kuanzishwa kwake ikiwa ni pamoja na kutakiwa kufanya vizuri zaidi ili kutoharibu rekodi hiyo waliyoiweka.

Hayo yalibainishwa na Chami Sasamka Mkaguzi wa Kanda ya Dodoma wakati wa kikao maalum cha baraza la madiwani kwa ajili ya kupitia hoja za Mdhibiti na Mkaguzi wa Fedha za serikali (CAG) kilichofanyika katika ukumbi wa mikutano wa Kondoa Irangi.

“Ushirikiano mzuri uliopo baina ya halmashauri yenu na ofisi yetu umepelekea mmepata hati safi na mmepunguza hoja na nina imani ushirikiano uliopo pia katika menejimenti yenu utasaidia kuboresha majibu kwa hoja chache zilizosalia.”Alisema Chami

Hata hivyo aliwashauri viongozi na watendaji wa halmashauri kuendelea kusimamia vizuri halmashauri ili kuwaleta maendeleo ambayo wananchi wanayahitaji na kuendeleza rekodi waliyonayo ya kupata hati safi.

Kwa upande wake Mwenyekiti wa Halmshauri ya Mji wa Kondoa Mhe. Hamza Mafita aliwapongeza waheshimiwa madiwani na wakuu wa Idara kwa ushirikiano wao ambao umefanikisha kupatikana kwa rekodi hiyo na kuahidi kuendelea kusimamia vizuri ili kuendeleza rekodi hiyo.

Akiongea katika kikao hicho Mkurugenzi wa Halmashauri ya Mji wa Kondoa Msoleni Dakawa aliishukuru ofisi ya Mdhibiti na Mkaguzi Mkuu wa hesabu za serikali kwa ushauri wao na kuahidi kuendelea kufanyakazi kwa kufuata sheria, taratibu na kanuni ili kuepukana na hoja ambazo zimekuwa zikisababisha hasara kwa serikali.

Akiwasilisha taarifa ya Halmashauri kwa niaba ya Mkurugenzi Mweka Hazina wa Halmashauri ya Mji Onesmo Mwonga alisema kuwa katika mwaka wa fedha 2017/2018 halmashauri ilikuwa na hoja 30 ambapo baada ya majibu kuwasilishwa na uhakiki kufanyika hoja 10 zilipendekezwa kufungwa na kusalia na hoja 20 ambazo zipo katika hatua mbalimbali za utekelezaji na uhakiki utafanyika wakati wa ukaguzi wa mwaka 2018/2019.