Kondoa Mji wapongezwa kupata hati safi kwa mwaka 2023/2024

Tarehe iliyowekwa: June 10th, 2025

Halmashauri ya Mji Kondoa imepongezwa kwa kupata hati safi katika ukaguzi wa fedha wa mwaka 2023/2024 na kupelekea Halmashauri kupata hati safi kwa miaka minne mfululizo jambo ambalo limeipa heshima kubwa Halmashauri na mkoa wa Dodoma kwa ujumla.

Pongezi hizo zimetolewa na Katibu Tawala Msaidizi Seksheni ya Ufuatiliaji na Tathmini Ndg. Erick Ntikahela kwa niaba ya Mkuu wa Mkoa wa Dodoma Mhe. Rosemary Senyamule wakati wa Mkutano Maalum wa Baraza la Madiwani la kupitia na kujadili hoja za Mdhibiti na Mkaguzi wa hesabu za Serikali (CAG) kilichofanyika katika ukumbi wa mikutano wa Halmashauri.

“Mhe Mwenyekiti kila wakati ninaamini haya mafanikio makubwa yametokana na uwepo wa mafanikio  chanya baina yenu Waheshimiwa Madiwani, Watendaji wa Halmashauri, viongozi na wadau mbalimbali wa Halmashauri hivyo nawasihi endeleeni kudumisha ushirikiano huo ili kuiwezesha Halmashauri kuendelea kupata hati safi kila mwaka”amesisitiza Erick

Aidha amewataka kuhakikisha hoja zilizobakia zinajibiwa ili ziweze kuhakikiwa na kufungwa kwa kuzingatia sheria, kanuni, taratibu na maelekezo yaliyowekwa na Serikali pia kuweka katika vikao vya kisheria agenda ya hoja kuwa ya kudumu ili kuiepusha Halmashauri kuwa na hoja zisizojibika.

Akiongea kwa upande wake Mkaguzi Mkazi wa Mkoa wa Dodoma Ndg. Karim Mwinyimbegu amelipongeza Baraza la Waheshimiwa Madiwani kwa namna walivyojadili hoja zilizowasilisha na kuipongeza Halmashauri kwa kupata hati safi na kasi ya utekelezaji wa hoja za ukaguzi zilizoibuliwa kwani zimejibiwa kwa asilimia 55 kiwango ambacho kinaridhisha.

Ameongeza kwa kuishauri Menejimenti kuhakikisha inashirikiana na wakaguzi kuona namna inavyoshughulikia hoja za nyuma badala ya kujibu tu hoja za mwaka husika kwa kuwa ukaguzi mpya huangalia pia hoja za nyuma hivyo kuongeza idadi ya hoja kwa Halmashauri.

Naye Mwenyekiti wa Halmashauri ya Mji Kondoa Mhe. Mohamed Kiberenge amesema suala la kujibu hoja za nyuma limechukuliwa na baraza la Madiwani kwa ajili ya utekelezaji na kuwa hoja zingine ambazo zipo ndani ya uwezo wa Halmashauri zitafanyiwa kazi kwa kipindi kilichobakia na kumpongeza Mkurugenzi kwa kasi nzuri ya kujibu hoja.

Awali akisoma taarifa ya Mdhibiti na Mkaguzi wa Hesabu za Serikali Mweka Hazina Ndg. Kabengwe Lufulondama amesema Halmashauri ya Mji Kondoa kwa kipindi cha mwaka wa fedha ilikuwa na hoja 22 zilizoibuliwa na Mdhibiti na Mkaguzi wa Hesabu za Serikali ambapo majibu yamehakikiwa na hoja 3 zimependekezwa kufutwa na hoja 19 zipo katika hatua mbalimbali za utekelezaji na kwa kipindi cha nyuma ilikuwa na hoja 73 ambapo hoja 51 zimejibiwa na zimependekezwa kufutwa na hoja 22 zipo hatua mbalimbali za utekelezaji.