Kondoa Mji washauriwa kunywa maziwa kuboresha afya

Tarehe iliyowekwa: June 1st, 2021

Na. Leah Joseph

Afisa Mifugo Halmashauri ya Mji Kondoa Bi. Semeni Mwakasege ameiasa jamii kujenga utaratibu wa kunywa maziwa angalau glasi moja kwa siku ili kuboresha afya zao na kujenga jamii imara.

Kauli hiyo ameitoa wakati wa kugawa maziwa na kutoa elimu juu ya umuhimu wa kunywa maziwa katika kilele cha wiki ya maadhimisho ya unywaji wa maziwa mashuleni yaliyofanyika katika shule za msingi Kondoa Mji hivi karibuni.

"Maziwa ni muhimu katika mwili wa binadamu kwa kuwa yana virutubisho vingi vinavyohitajika kujenga mwili hivyo mnatakiwa kujenga utaratibu wa kunywa maziwa pamoja na kutumia bidhaa zake ili muweze kuimarisha afya zenu",amesema Bi. Semeni

Aidha ameongeza kwa kutaja faida za maziwa katika mwili wa binadamu kuwa ni pamoja na kujenga misuli, kupunguza uzito, kuongeza hamu ya kula, kulainisha ngozi, kutoa kiungulia na kuondoa msongo wa mawazo.

"Kama tulivyoona faida za unywaji wa maziwa lakini ipo haja ya wafugaji wetu kubadili mtindo wa ufugaji badala ya kufuga mifugo mingi kwa ufahari wajikite katika ufugaji wa kisasa ambapo itasaidia kupata maziwa mengi na kupelekea kuongeza vipato vyao kwa kuyauza katika soko la maziwa", amesisitiza Bi. Semeni.

Halikadhalika Bi. Semeni amesema kuwa licha ya maziwa kuwa muhimu kwa rika zote lakini wameona ni vyema kuanza na watoto ambao ni kundi lililopo katika hatua za ukuaji na kwamba maziwa yana msaada mkubwa katika kuimarisha mifupa na meno na kuahidi kuwa wakati ujao watawafikia watu wengi zaidi.

Kwa upande wake Mwalimu Mkuu wa Shule ya Msingi Maji ya Shamba Mwalimu Aziza Mtanga amemshukuru Mkurugenzi wa Halmashauri ya Mji Kondoa Msoleni Dakawa kwa kutambua umuhimu wa maziwa kwa wanafunzi na kuwapatia katika maadhimisho hayo na kuahidi kuwa watakuwa mabalozi wazuri katika kutoa elimu juu ya faida za unywaji wa maziwa kwa jamii nzima.

Kilele cha maadhimisho ya wiki ya unywaji wa maziwa yamefanyika kitaifa Mkoa wa Tanga ambapo Halmashauri ya Mji Kondoa imeshiriki kwa kugawa maziwa kwa wanafunzi zaidi ya mia tatu pamoja na walimu katika shule ya Msingi Ubembeni, Maji ya Shamba na Iboni huku kauli mbiu ikisema " Kunywa Maziwa ya Kwetu Ongeza uzalishaji na Usindikaji".