Kondoa Mji watoa mafunzo kwa vikundi 16 vya mikopo awamu ya tatu

Tarehe iliyowekwa: June 24th, 2025

Vikundi 16 vya Wanawake, Vijana na Watu wenye Ulemavu vya Halmashauri ya Mji Kondoa wamepatiwa mafunzo ya kuwajengea uwezo wa kuendesha shughuli zao ili wajiinue kiuchumi na kufanya marejesho ya fedha walizopewa.

Mafunzo hayo yamefanyika katika ukumbi wa mikutano wa Kondoa Irangi ambapo yamefunguliwa na Mkurugenzi wa Halmashauri ya Mji Kondoa Ndg. Said Majaliwa.

"Niwapongeze na kuwaomba muwe wasikivu na kuelewa mtachofundishwa kwa kuwa mmekidhi vigezo na mmepitia michakato mbalimbali hivyo mkafanye vizuri ili mikopo hiyo irudi na kuwanufaisha wengine"amesema Mkurugenzi Majaliwa

Aidha amewasisitiza kutunza nyaraka za vikundi husika ili wakati wa ukaguzi wasipate shida ikiwemo kuwa na ofisi ambayo taarifa zote za kikundi zitapatikana huko badala ya kumuamini mtu mmoja.

Aidha ameongeza kwa kuwataka Maafisa Maendeleo ya Jamii kuhakikisha wanawapa mbinu za kufanya biashara kulingana na kiwango cha fedha walichopewa ili tija ya fedha hizo zionekane.

"Vikundi viliomba zaidi ya shilingi milioni 300 ambapo Halmashauri imetoa shilingi milioni 90 hivyo wengi mmepata fedha tofauti na mlichoomba hivyo mfanye biashara kulingana na kiwango mlichopewa ili msishindwe kufanya marejesho" amesema Mkurugenzi Majaliwa

Akiongea awali Mkuu wa Idara ya Maendeleo ya Jamii Halnashauri ya Mji Kondoa Ndg. Wenceslaus Mbilango amesema mikopo inatolewa kwa awamu ya tatu toka iliporejea kutolewa mwaka jana ambapo jumla ya vikundi 16 vimepatiwa shilingi milioni 90.

Nao wanufaika wa mikopo wameishukuru Halmashauri kwa kuwafikiria na kuwapatia mikopo ambayo itakwenda kubadilisha maisha yao kiuchumi na kuahidi kurejesha kama taratibu zilivyo.

Halmashauri ya Mji Kondoa inatoa mikopo kwa awamu ya tatu baada ya kufunguliwa mwezi Oktoba 2024 ambapo zaidi ya shilingi milioni 457 zimetolewa kwa vikundi 54.