Kondoa Mji yaanza kutoa huduma ya upimaji udongo kwa wakulima

Tarehe iliyowekwa: September 14th, 2023

Halmashauri ya Mji Kondoa kupitia Divisheni ya Kilimo, mifugo na Uvuvi imeanza kutoa huduma ya kupima udongo katika mashamba ya wakulima bila gharama yoyote lengo likiwa ni kuongeza tija katika uzalishaji kwa wakulima.

Hayo yamesemwa na Mkuu wa Divisheni ya Kilimo na Mifugo Ndg. Monica Kimario wakati wa mahojiano maalum yaliyofanyika ofisini kwake hivi karibuni.

“Utaratibu wa uchukuaji wa sampuli za udongo kwa kata zote nane umeanza mpaka sasa tumechukua udongo katika kata tano ambazo ni Kingale, Serya, Suruke, Kolo na Bolisa ambapo tutaendelea katika kata za Kondoa M,”amesema Ndg. Monica

Amesema kuwa kifaa hicho chenye thamani ya shilingi milioni 11 kimetolewa na Serikali nchi nzima kupitia Wizara ya Kilimo kwa lengo la kuongeza uzalishaji kwa wakulima ili walime kilimo chenye tija katika eneo dogo kwa kuwa kifaa kitaonyesha kitu gani kimepungua kwenye udongo ili kifanyiwe kazi.

“Zoezi hili ni endelevu hivyo wakulima ambao tumeshapita kwenye kata zao na wanahitaji huduma hii wawaone maafisa ugani wa kata zao ili udongo ukachukuliwe kwenye mashamba yao na watapewa majibu na wale wa kata zilizosalia wajiandae kwa ajili ya zoezi na linafanyika pia kwa taasis ambazo zinajishughulisha na kilimo,”amesema Ndg. Monica

Ameendelea kusema kuwa zoezi la kupima udongo linafanyika katika ofisi za Halmashauri na si shambani wao wanachofanya ni kuchukua udongo na kuja nao ofisini kwa ajili ya vipimo na kuongeza kuwa udongo unaotakiwa kuchukuliwa ni wa kipindi cha kiangazi hivyo wakulima watumie fursa hii kwa kipindi hiki na si wakati wa masika ambapo majibu yanayoweza kupatikana si halisia.

Kwa upande wake Afisa Kilimo Ndg. Hassan Kiseto amesema zoezi hili litasaidia kujua afya ya udongo uliopo, aina ya mazao unayotakiwa kulimwa katika eneo husika, aina ya mbolea itakayotumika na kiasi cha mbolea itakayotumika na kujua kiasi gani cha chokaa kitakachotumika kuongeza uzalishaji.

“Wakulima kipindi cha nyuma walikuwa wakishauriwa kuweka mbolea ya kupandia kwa kipimo maarufu ambacho ni kifuniko cha soda katika shina moja japokuwa  kilisaidia kwa muda mrefu lakini huwezi kujua kama upo sahihi kutokana na ardhi husika,”amesisitiza Ndg. Kiseto

Amemshukuru Rais wa Jamhuri ya Muungano wa Tanzania Dkt. Samia Suluhu Hassan na Waziri wa Kilimo Mhe. Hussein Bashe ambao wamehakikisha bajeti inatengwa na inatekelezwa katika kufanya kilimo kuwa cha kitaalamu na kisasa kwa hatua hii tunadhani tutafikia ukuaji wa kilimo kwa asilimia 10 ifikapo 2030 agenda kuu.

Huduma ya upimaji udongo inatolewa bila gharama yoyote ambapo katika maabara za watu binafsi hupimwa kwa shilingi elfu sabini kwa sampuli moja na kwa shamba moja huchukuliwa sampuli zaidi ya tatu ambayo ni gharama kubwa kwa mkulima hivyo wananchi watumie fursa ya Halmashauri ambapo huduma hii inatolewa bure.