Kondoa Mji yakabidhi hundi ya milioni 193 kwa vikundi

Tarehe iliyowekwa: November 7th, 2024

Mwenyekiti wa Halmashauri ya mji Kondoa Mhe. Mohamed Kiberenge amekabidhi hundi ya zaidi ya shilingi milioni 193 kwa vikundi vya wanawake, vijana na watu wenye ulemavu ikiwa ni mikopo itokanayo na asilimia 10 ya mapato ya ndani ya Halmashauri.

Hafla ya makabidhiano imefanyika katika ukumbi wa mikutano wa Halmashauri ya Mji Kondoa na kuhudhuriwa na wanufaika wa mkopo huo.

Aidha wanufaika wa mkopo huo ni vikundi vya waendesha bodaboda ambao wamenufaika kwa kununuliwa pikipiki 15 zenye thamni ya shilingi milioni 55.

Akiongea na wanufaika wa mikopo hiyo Mwenyekiti wa Halmashauri ya Mji Kondoa Mhe. Mohamedi Kiberenge amewaasa kutofanyia kazi zingine fedha walizopatiwa kwani wanahitaji kutengeneza faida mapema ili kuwapisha na wengine kukopa.

"Mmepata fedha na mlikuwa na malengo wakati mnaomba fedha hizo, tunaomba malengo yenu yakatimie kutokana na fedha ambazo mmezipata" amesema Mhe. Kiberenge.

Kwa upande wake Afisa Maendeleo Halmashauri ya Kondoa Mji Ndg. Irine Mosha amesema kuwa mikopo hiyo itakwenda kutoa ajira kwa watu mbalimbali pamoja na kuwainua kimaisha kwa kuwa mikopo hiyo itachochea mzunguko mkubwa wa fedha katika mji wa Kondoa.

Mikopo hiyo imetolewa kwa mara ya kwanza baada ya kusitishwa awali ili kuboresha kanuni za utoaji wa mikopo hiyo kwa lengo la kuwanufaisha watu wengi zaidi.