KONDOA MJI YANG'ARA CHF

Tarehe iliyowekwa: November 14th, 2017

 Mwenyekiti wa bodi ya CHF Iliyoboreshwa Halmashauri ya Mji Kondoa Mh. Zainabu Haroub amewapongeza wajumbe wa bodi hiyo kwa kusimamia vizuri mfuko huo na kuwa mfano wa kuigwa na halmashauri zingine.

Pongezi hizo zilitolewa wakati wa kikao cha bodi ya CHF Iliyoboreshwa kilichofanyika hivi karibuni katika ukumbi wa mikutano wa Halmashauri ya Mji ikiwa ni kikao cha robo ya kwanza kwa mwaka wa fedha 2017/2018.

Alisema kuwa bodi hiyo imekuwa ikisimamia majukumu yake kwa ukamilifu na kupelekea kuongezeka kwa wanachama na kuboresha huduma za wanachama na usimamizi mzuri wa fedha za mfuko hali ambayo imesababisha wafadhili wa mradi kuja na kuona namna walivyoweza kufanikisha yote hayo kwa ufanisi.

Aidha aliongeza kuwa pamoja na changamoto walizonazo lakini bodi hiyo haijakata tamaa na imeweza kufanyakazi ambayo imeonekana kwa wafadhili waliokuja kujifunza mafanikio ya bodi hiyo il halmashauri zingine zijifunze kutoka Halmashauri ya Mji Kondoa.

Pia aliiomba serikali kuongeza baadhi ya huduma ili ziweze kuhudumiwa na mfuko huo wa Afya ya Jamii hasa kwa akina mama na watoto ili kuwapunguzia mzigo wa matibabu kwa makundi hayo.

Hata hivyo alisema wanataendelea kuhamasisha wananchi kujiunga na Mfuko wa Afya ya Jamii iliyoboreshwa kwani unamanufaa kwa wananchi ambapo jumla ya wanafamilia sita wanatibiwa kwa mwaka mzima katika vituo vya serikali ndani ya mikoa mitatu ya Dodoma, Morogoro na Shinyanga na kuondokana na adha ya kulipia huduma kila waendapo hosptali kupata huduma.