Kondoa Mji yapongezwa ujenzi zahanati Chandimo kwa mapato ya ndani

Tarehe iliyowekwa: February 13th, 2025

Halmashauri ya Mji Kondoa imepongezwa kwa kusogeza huduma za afya kwa wananchi kwa kutoa mapato ya ndani zaidi ya shilingi milioni 70 kwaajili ya ujenzi wa Zahanati katika Mtaa wa Chandimo. 

Pongezi hizo zimetolewa na Mganga Mkuu wa Mkoa wa Dodoma Dkt. Thomas Rutachunzibwa mbele ya wananchi wa Chandimo Wakati wa ziara ya ufuatiliaji miradi ya maendeleo robo ya pili inayotekelezwa katika Halmashauri ya Mji Kondoa.

Amesema ni Halmashauri imefanya jambo zuri sana hivyo wananchi wanapaswa kwa kuwaunga mkono katika kujitolea nguvu zao kwa kuwa Serikali hutoa fedha kwa maeneo yenye maboma lakini Halmashauri imejenga zahanati toka mwanzo yenyewe hivyo wanastahili pongezi.

Aidha amewataka wananchi wa mtaa wa Chandimo kujitolea kujenga wodi ya kujifungulia akinamama kwa kuwa jengo la zahanati ambalo lipo hatua za mwisho za ukamilishaji halina sehemu ya kinamama kujifungilia hivyo wahamasishane mmoja mmoja ili kuanza ujenzi huo.

“Nawapongeza sana kwa kujitoa kwenu kuja kufanya usafi katika zahanati yenu lakini nawashauri tu ili kuwasaidia akinamama zetu wajifungulie hapa tujitolee tujenge sehemu ya wao kujifungulia, shimo na kichomea taka na siyo kwamba jengo likikamilika hamtapata huduma hapana mtapata isipokuwa huduma ya kujifungua kwa akina mama,”amesema Dkt.

Kwa upande wake Mtendaji wa Kata ya Serya Ndg. Hamisi Juma amemuhakikishia Mganga Mkuu kuwa watakwenda kutekeleza yote waliyoambiwa ambapo wataitisha mkutano wa Pamoja na wananchi ili kuwashirikisha ambapo baadhi ya wananchi waliokuwa eneo la Zahanati walikubaliana na ushauri uliotolewa.

Ameendelea kuipongeza Halmashauri kwa usimamizi mzuri wa mradi wa ujenzi wa Shule Mpya ya kata ya Suruke na ujenzi wa madarasa katika Shule ya Msingi Chemchem na kuwataka walimu kuyatunza madarasa hayo yatakapoanza kutumika.

Pia ameipongeza menejimenti kwa kuonyesha ushirikiano na uelewa wa miradi kwa Pamoja bila kujali kazi ya mtu hali inayoongeza uwajibikaji wa Pamoja jambo ambalo amesema hajaliona katika maeneo mengine.

Viongozi hao wametembelea miradi mbalimbali ikiwemo Zahanati ya Chandimo, Zahanati ya Ausia, vikundi viwili vinavyonufaika na mkopo wa asilimia 10 ya mapato ya Halmashauri, mradi wa ujenzi wa Shule ya Sekondari Suruke na mradi wa ujenzi wa madarasa Shule ya Msingi Chemchem ambapo waliongozana na Kaimu Mkurugenzi Ndg. Irene Mosha na wataalam kutoka Idara na Vitengo.