Kondoa Mji yatoa motisha kwa watumishi waliofanya vizuri ukusanyaji wa mapato 2024/2025

Tarehe iliyowekwa: July 8th, 2025

Mkurugenzi wa Halmashauri ya Mji Kondoa Ndg.Said Majaliwa ametoa pongezi kwa watumishi waliofanya vizuri katika ukusanyaji wa mapato kwa mwaka wa fedha 2024/2025.

Pongezi hizo zimeambatana na zawadi ya cheti pamoja na fedha taslimu Tsh 100,000 kama sehemu ya kuwashukuru kwa kufanya vizuri lakini pia kuwahamasisha watumishi wengine kufanya vizuri kwa kipindi kingine.

"Kwanza nawashukuru sana kwa namna tulivyosaidiana katika mwaka huu wa fedha, tumeandaa tuzo kwa watu ambao wamefanya vizuri"amesema Mkurugenzi Majaliwa

Hata hivyo Majaliwa amesema kuwa tuzo hizo zinatakiwa kuwa motisha kwa watumishi ambao hawajapata ili nao waweze kupata kwa msimu mwingine mwaka ulioanza wa 2025/2026.

Tuzo hizo zimetolewa kwa makundi ya Wakuu wa Idara na Vitengo, Watendaji wa Kata, Watendaji wa Mitaa, Maafisa Ugani, Waganga Wafawidhi wa hospitali, vituo vya afya na zahanati, pamoja na Wakuu wa Shule za Msingi na Sekondari.

Aidha katika kikao hicho imefanyika tathimini ya ukusanyaji wa mapato kwa mwaka wa fedha 2024/2025 na kuweka mikakati mbalimbali ya kuongeza ukusanyaji wa mapato Ili kufikia lengo kwa mwaka wa fedha 2025/2026 ambapo halmashauri inakusudia kukusanya bilioni 2.9.

"Humu ndani kuna Watendaji wa Kata na Mitaa, kila mmoja kwa nafasi  yake anawajibika kuhakikisha tunakusanya mapato ya Serikali"amesisitiza Mkurugenzi Majaliwa

Majaliwa ameeleza kuwa kila Mtendaji anapaswa kujua vyanzo vyake vyote vya mapato ili iwe rahisi kuvifuatilia kwa ukaribu pasipo kupoteza mapato ya aina yoyote.

Ameongeza kwa kuwaelekeza watumishi kuhakikisha wanadhibiti upotevu wa mapato hususani ushuru wa mazao katika kipindi hiki cha mavuno lakini pia kutengeneza mfumo ambao mtu hawezi kuiba mapato ya halmashauri kwa kufanya ukaguzi wa mara kwa mara kwa mawakala.

Shughuli ya utoaji wa tuzo pamoja na kikao kazi imefanyika katika ukumbi wa Ofisi ya Halmashauri ya Mji Kondoa huku zaidi ya watumishi 60 wakihudhuria kikao hicho.