Kondoa Mji yawazawadia walimu waliofanya vizuri

Tarehe iliyowekwa: May 18th, 2021

Walimu wa Shule za Sekondari waliofanya vizuri katika masomo yao na shule zao Halmashauri  ya Mji Kondoa wametunukiwa vyeti na fedha taslimu ikiwa ni motisha kwao ili kuboresha ufundishaji na kuinua taaluma.

Hafla hiyo imefanyika katika ukumbi wa Halmashauri ya Mji Kondoa ambapo shule za Sekondari Bicha, Kondoa Islamic, Shule ya Wasichana Kondoa, Shule ya Sekondari Embeko  walimu wao wamezawadiwa kwa kufanya vizuri.

Akiongea  mgeni rasmi katika hafla hiyo Mwenyekiti wa Halmashauri ya Mji Kondoa Mhe. Mohamed Kiberenge ameeleza kuwa kwa sasa wameanza kupiga hatua katika upande wa elimu  na kueleza kuwa katika awamu hii mafanikio yatakuwa makubwa zaidi.

"Nawasihi sana viongozi wa elimu pamoja na walimu kuzidisha kupeana uzoefu katika masuala ya taaluma ili Halmashauri ya Mji Kondoa iweze kuongoza kimkoa katika sekta ya elimu,"amesema Mhe. Kiberenge.

Afisa Elimu Sekondari Mwalimu Annette Nara ametoa takwimu za ufaulu kwa mwaka 2019 na 2020 ambapo ufaulu umeongezeka na ndiyo hali iliyowapelekea Idara kutoa zawadi kwa Halmashauri.

"Ili kujua kuwa shule za serikali za sekondari zinafanya vizuri au lah huwa tunazitenganisha na shule binafsi na  kwa kufanya hivyo tumefahamu kuwa mwaka 2020 ufaulu uliongezeka kutoka 71.77 hadi 76.81 na kufanikiwa kupunguza wanafunzi waliofeli kutoka asilimia 28.22 mwaka 2019 hadi 23.19 mwaka 2020,"amesema Afisa Elimu Sekondari Annette Nara

Mwenyekiti wa Kamati ya Elimu Halmashauri ya Mji Kondoa diwani wa kata ya Chemchem Mhe. Zainabu Haroub amempongeza Afisa Elimu Sekondari kwa kuwashirikisha walimu wote na kuwapongeza walimu kwa kuwa kwa kufanya hivyo kutawatia moyo walimu.

"Nashauri shule zinazofanya vizuri  kushirikiana na shule nyingine ili kuweza kuikuza sekta ya elimu Kondoa na naomba kamati za elimu zishirikishwe kuweza kuzungumza na wazazi kukuza elimu kwani hakuna ufaulu pasipo na mzazi,"amesisitiza Mhe. Zainabu

Wakizungumza kwa nyakati tofauti walimu hao mara baada ya kupokeza zawadi wameeleza mbinu wanazozitumia katika ufundishaji zinachangia katika kukuza elimu huku pia wakizitaja changamoto kuwa ni wazazi kutokuwa na msukumo kwa watoto wao wanapokuwa shuleni.

Hafla ya kuwapongeza walimu wa Sekondari imefanyika ba kuwashirikisha Waheshimiwa Madiwani, Wakuu wa Idara, Wakuu wa Shule aidha zawadi zilitolewa kwa shule zilizofanya vibaya ambazo ni Shule ya Sekondari Serya, Ula, Gubali na Dilai.