LAAC yaishauri serikali kupeleka fedha Kituo Cha Afya Kolo

Tarehe iliyowekwa: March 16th, 2024

Kamati ya kudumu ya Bunge ya Fedha za Serikali za Mitaa (LAAC) imeishauri serikali kupitia OR TAMISEMI kufanya tahmini na kupeleka fedha kwa ajili ya umaliziaji wa majengo ambayo hayajakamilika katika kituo cha Afya Kolo ili kitoe huduma iliyokusudiwa.

Ushauri umetolewa na Mwenyekiti wa Kamati hiyo Mhe. Halima Mdee wakati akisoma taarifa ya majumuisho ya kamati katika mkoa wa Dodoma yaliyofanyika katika viwanja vya Kituo cha Afya Kolo na kuhudhuriwa na wawakilishi kutoka Wilaya ya Chamwino na Halmashauri ya Wilaya ya Kondoa.

“Tumeona kituo cha Afya Kolo kilipokea shilingi milioni 400 badala ya 500 zilizotengwa kwenye bajeti tunaishauri OR TAMISEMI kuwaleta milioni 100 iliyosalia kwa ajili ya ukamilishaji wa jengo la mama na mtoto likiwa limeunganishwa na jengo la upasuaji ili huduma stahiki ziweze kutolewa katika kituo hiki”amesema Mhe. Mdee

Aidha amewataka wataalam kutoka Halmashauri ya Mji Kondoa kufanya tathmini ya kazi iliyobakia ma kupata gharama halisi za fedha zinazohitajika kwa ajili ya kupeleka maombi hayo OR TAMISEMI kwa ajili ya kupatiwa fedha za kumalizia.

Ameongeza kuzitaja kazi ambazo hazijakamilika katika mradi huo kuwa ni pamoja na ujenzi wa kichomea taka, uwekaji wa marumaru na ufungaji wa bodi kwa jengo la mama na mtoto na upasuaji na kufanya marekebisho katika vibaraza kwa kufunga bodi ambazo hazijakaa sawa.

“Naomba muelewe kuwa kamati hii inashughulika na fedha za serikali za mitaa kwa kuzingatia taarifa ya Mkaguzi na Mdhibiti wa fedha za serikali (CAG) baada ya kuona vitu ambavyo havijakaa sawa na tuliyoyaona tunatoa maelekezo ili yafanyiwe kazi ili tukirudi tena yasijitokeze tena,”amesisitiza Mhe. Mdee

Kwa upande wake Naibu Katibu Mkuu OR TAMISEMI Ndg. Charles Msonde ameishukuru kamati kwa kazi kubwa wanayoifanya kwa kuwa inawasaidia kuongeza ufuatiliaji katika miradi na kuwaambia kuwa wameyapokea maelekezo yote ili miradi itekelezwe kwa manufaa ya wananchi na kuzitaka sekretarieti za mikoa kuongeza ufuatiliaji ili miradi itekelezwe kulingana na thamani ya fedha zilizotolewa.

Akiongea kwa niaba ya wananchi wa Kolo Mwenyekiti wa kamati ya ujenzi wa kituo hicho Ngd. Abubakari Mtundu ameishukuru serikali kwa kuona umuhimu wa kuwajengea kituo hicho kwa kuwa kimekuwa ni msaada mkubwa kwa wananchi wa Kolo kutokana na ajali zinazotokea katika Mlima wa Kwadinu ambapo majeruhi walikosa msaada wa haraka hivyo kupoteza maisha.

Kamati ya Bunge ya kudumu ya fedha za serikali za mitaa imefanya ziara katika halmashauri tatu za mkoa wa Dodoma ambazo ni Halmashauri ya Wilaya ya Chamwino, Kondoa Mji na Wilaya ya Kondoa kwa ajili ya kukagua miradi ya maendeleo ambapo katika Halmashauri ya Mji Kondoa imekagua Shule ya Sekondari Tura Day na Kituo cha Afya Kolo.