Maafisa Elimu Idara ya Elimu Sekondari na Kata kurudi darasani kufundisha

Tarehe iliyowekwa: July 24th, 2019

Maafisa kutoka Idara ya Elimu Sekondari na Maafisa Elimu kata Halmashuari ya Mji Kondoa wamekubaliana kurudi darasani na kufundisha kwa kushirikiana na mwalimu wa somo husika ambapo watapanga utaratibu maalum ili kuhakikisha wanainua kiwango cha ufaulu kwa wanafunzi wa kidato cha nne.

Azimio hilo limefikiwa leo katika kikao cha pamoja cha maafisa kutoka Idara ya Elimu Sekondari, Maafisa Elimu Kata na Wakuu wa Shule kilichofanyika katika kituo cha Walimu kilichopo Mtaa wa Iboni hivi karibuni.

Akiongea katika kikao hicho Kaimu Afisa Elimu Sekondari Pancracy Maleko alisema kuwa lengo la kuweka utaratibu huo ni kuhakikisha kuwa kila mtu kwa nafasi yake anakuwa anashiriki katika kuongeza ufaulu na kufuta daraja la sifuri katika matokeo ya kidato cha nne mwaka huu na bila kuathiri shughuli zao za kila siku.

“Sisi wote ni walimu tunaweza kufundisha ila si kwa kupangwa kwenye vipindi bali kwa kuweka utaratibu mzuri na walimu wa masomo husika na naamini hili linawezekana na litatuinua katika mtihani wetu wa mwisho.”Alisema mwalimu Maleko.

Aliendelea kueleza kuwa katika mtihani wa utahimilifu (Mock) mkoa halmashauri ya Mji Kondoa imeongoza kwa kushika nafasi ya kwanza na kuwapongeza wakuu wa shule kwa kazi waliyofanya hadi kushika nafasi hiyo na kusema kuwa kwa mikakati iliyowekwa na Idara Halmashauri itaendelea kufanya vizuri ili kuendelea kushika nafasi ya kwanza kimkoa na kuendelea kufanya vizuri kitaifa.

Hata hivyo aliongeza kuwa Idara ina mpango wa kutengeneza mfumo ambao utakuwa na taarifa muhimu za shule zote ili kuachana na mazoea ya wakuu wa shule kuleta taarifa kila mara halmashauri ambapo kwa uwepo wa mfumo huo taarifa zote zitawekwa huko na kufanyiwa marekebisho kila mwezi hali ambayo pia itaokoa muda mwingi wa walimu wakuu.

Afisa Elimu Taaluma elimu Sekondari Halmashauri ya Mji Alfred Jengo aliupongeza uongozi wa Shule ya Wasichana Kondoa kwa kufanya vizuri katika mtihani wa kidato cha sita kwa mwaka huu na kuwataka wazazi kufuata taratibu zilizowekwa kisheria katika kuwahamisha wanafunzi ili kuhakikisha mwanafunzi anakuwa salama.

Shule ya Sekondari ya Kondoa Islamic imeshika nafasi ya kwanza kiwilaya na nafasi ya 12 kimkoa kati ya shule 251, Embeko imeshika nafasi ya pili kiwilaya na 18 kimkoa, Ibra imeshika nafasi ya tatu kiwilaya na 20 kimkoa na mwisho shule ya Sekondari ya Kolo ambayo imeingia katika shule 50 bora kimkoa.” Alisema Jengo

Katika kikao hicho wajumbe walipata nafasi ya kubadilishana uzoefu wa shule za serikali na binafsi na kuweka mikakati ya kuinua ufaulu wa shule za serikali ambapo walikubaliana walimu wakuu wote kuhakikisha walimu wanamaliza silabasi, kutoa mazoezi na majaribio ya kutosha, kutoa motisha kwa walimu watakaofaulisha vizuri na kugawa walimu kwa usawa.