MABARAZA YA DODOMA KUBORESHWA

Tarehe iliyowekwa: December 4th, 2017

Mabaraza ya waheshimiwa madiwani wa Halmashauri za mkoa wa Dodoma wametakiwa kuendesha mabaraza kwa kufuata kanuni na taratibu ili kuwa na mabaraza yenye hadhi ya makao makuu ya nchi.

Hayo yalisemwa na Bwana Samweli Kuboja Afisa serikali za mitaa kutoka ofisi ya mkuu wa mkoa wa Dodoma wakati wa kikao cha baraza la madiwani wa halmashauri ya Mji Kondoa katika ukumbi wa mikutano wa Kondoa Irangi.

Alisema kuwa uendeshaji wa mabaraza unapaswa kuzingatia kanuni ikiwa ni pamoja na kujadili taarifa zilizomo kwenye makabrasha ikiwa ni pamoja na kuanza na kumaliza mabaraza kwa wakati na kuwashauri kutumia muda mwingi kwenye kamati za kisheria na vikao vya kata.

Kwa upande wake Mwenyekiti wa ALAT mkoa wa Dodoma Mheshimwa White Zuberi alisema wenyeviti wa Halmashauri za Mkoa wa Dodoma katika kuboresha hilo wameanzisha utaratibu wa kuhudhuria vikao vya halmashauri zote ndani ya mkoa ili kujifunza zaidi na kuboresha zaidi utendaji kazi.

Baraza la madiwani la Halmashauri ya Mji Kondoa limefanyika hivi karibuni ambapo lilihudhuriwa na wenyeviti wa Halmashauri za mkoa wa Dodoma na afisa serikali za mitaa kutoka ofisi ya Mkuu wa Mkoa wa Dodoma.