Madiwani wataka kushirikiana kuleta maendeleo

Tarehe iliyowekwa: February 9th, 2023

Waheshimiwa madiwani wametakiwa kuongeza umoja na ushikamano uliopo katika utekelezaji wa miradi ya maendeleo kwa kuwa wameaminiwa na wananchi na wameibeba dhamani ya Ilani ya Chama cha Mapinduzi.

Kauli hiyo imetolewa na Mwenyekiti wa Halmashauri ya Mji Kondoa Mhe. Mohamed Kiberenge wakati akiongea katika kikao cha baraza  la Waheshimiwa Madiwani la robo ya pili kwa mwaka wa fedha 2022/2023 kilichofanyika katika ukumbi wa mikutano wa Halmashauri ya Mji Kondoa.

“Tushirikiane kwa  pamoja mafanikio ya mji yanataka umoja siyo kubezana au kuona jambo la mtu mmoja si kweli  lazima kila mmoja anayejihisi ni mdau katika Mji huu wa Kondoa naye aonyeshe amesaidia nini katika jambo moja au rasilimali,”amesema Mhe Kiberenge

Aidha amesema kwa upande wa elimu sekondari katika matokeo ya kidato cha nne Halmashauri haijafanya vizuri hivyo wamemtaka Afisa Elimu Sekondari kufanya tathmini ya sababu zilizopelekea kushuka kwa ufaulu kwa kidato cha nne na pili japokuwa kuna baadhi ya shule ufaulu umepanda.

“Ukaangalie shida ni mwalimu mmoja mmoja wa somo, shida ni walimu au ushirikishwaji wa walimu si mzuri au hawataki kuwajibika au mwalimu alikuwa na shida gani lazima tujue kata nane tulitakiwa kuwa nafasi nzuri madiwani wapate taarifa na chama ili ufanyike ufuatiliaji wa pamoja,”amesisitiza Mhe Kiberenge

Ameongeza kwa kuzitaka kamati za mazingira kusimamia suala la utupaji hovyo wa taka na kuona ni jambo la pamoja na si la mtu mmoja hivyo Waheshimiwa Madiwani wakakae na kamati za kata ili kuweka mkakati wa pamoja na kufanya doria za mara kwa mara za kukagua usafi wa mji.

Kwa upande wa afya amewataka madaktari na manesi kuwajibika kwa nafasi zao kwa kutoa huduma kwa wananchi kwa kutumia lugha nzuri ili wananchi wafurahie huduma wanazopatiwa na kuokoa uchumi wao hasa wanaoenda Dodoma kupatiwa huduma.

Naye Mwenyekiti wa Chama Cha Mapinduzi Wilaya ya Kondoa Mhe. Hija Sulu amewataka Waheshimiwa Madiwani kwenda kuwaelezea Wananchi mafanikio kwenye kata zao na kuwataka kushirikiana, kupendana na kuvumiliana kama familia moja kwa lengo la kuwaletea maendeleo wananchi.

Kikao cha Baraza la Madiwani kimekaliwa kwa ajili ya kujadili taarifa za utekelezaji za kamati za kudumu robo ya pili ambapo mambo mbalimbali ya maendeleo yamejadiliwa na limeongozwa na Kaimu Mkurugenzi Mwalimu Annette Nara na kuhudhuriwa na Kamati ya Ulinzi na Usalama, Wakuu wa Idara na viongozi wa Chama cha Mapinduzi.