Mafunzo MEK, Wakuu wa Shule na Walimu Wakuu yahitimishwa

Tarehe iliyowekwa: September 29th, 2021

Mafunzo ya uongozi kwa Maafisa Elimu Kata, Walimu Wakuu na Wakuu wa Shule yaliyoandaliwa na Halmashauri ya Mji Kondoa kwa muda wa siku tatu yamehitimishwa rasmi na Kaimu Mkurugenzi Halmashauri ya Mji Kondoa.

Mafunzo hayo yamefanyika katika ukumbi wa Halmashauri ya Mji Kondoa na kutolewa na wakufunzi kutoka Chuo cha ADEM Bagamoyo ambapo mada mbalimbali zimewasilishwa.

Akiongea wakati wa kufunga mafunzo hayo Kaimu Mkurugenzi Halmashauri ya Mji Kondoa Mwalimu Annette Nara amesema washiriki wote wanapaswa kudumisha ushirikiano na upendo miongoni mwao na wanaowaongoza katika kutimiza majukumu yao ya kila siku.

"Nawasihi tusiombeane mabaya kwa kuwa wote ni viongozi na sisi siyo malaika na tusiache kuambiana mwenzetu anapokosea na mkimbiwa msishupaze shida ujirekebishe hakuna asiyekosea hata tukiambiwa na tunaowaongoza,"amesema Mwalimu Annette

Ameendelea kueleza kuwa wanapaswa kuheshimu nafasi zao kwa kuwa wanaowaongoza pia wana sifa za kuwa viongozi na wanatamani walipo hivyo ni bora wakashirikiana nao na kusaidiana nao katika kutimiza majukuju yao.

Kwa upande wake Mkufunzi kutoka Chuo cha ADEM Bagamoyo Venant Fundi amesema amefurahi kwa kuwa pamoja na viongozi hao na ana imani wamepata kitu kipya kutokana na mada zote alizowapatia na kuwashauri kumtumia vizuri Afisa Elimu  kwa kuwa ana uzoefu mkubwa katika kazi hiyo.

"Niwakumbushe kuwa nafasi zenu zinatamaniwa na watu wengi kwa kipindi tulichokaa hapa tumeondoa msongo wa mawazo na tumekuwa watu wamoja yaani Msingi na Sekondari msiende kujifungia mkashirikishane,"amesema Fundi

Akitoa shukrani zake Mwenyekiti wa mafunzo hayo Mwalimu Adam Awadhi amesema lengo la mafunzo hayo ni kutoa elimu ya uongozi kwa Walimu Wakuu na Wakuu wa Shule ambao wameteuliwa ikiwa ni pamoja na wa muda mrefu ili kuboresha utendaji kazi wao.

"Kiukweli mafunzo haya yamesaidia sana na kama yatatumiwa ipasavyo basi tutarajie makubwa na nimshukuru sana Mkurugenzi kwa kukubali mafunzo hayo kufanyika na walioratibu zoezi hilo kufanyika kwa kuwa hayajafanyika kwa kipindi kirefu,"amesema Mwalimu Awadhi

Mafunzo ya uongozi yamefanyika kwa siku tatu ambapo yamehudhuriwa na Maafisa Elimu Kata, Wakuu wa Shule na Walimu wakuu kwa lengo la kuboresha utendaji kazi wa viongozi hao na kuinua kiwango cha ufaulu.