MAHUSIANO MAZURI KULETA MAENDELEO KOLO

Tarehe iliyowekwa: February 5th, 2018

Watumishi wa Kata ya Kolo wametakiwa kudumisha mahusiano kati yao, viongozi wengine na wananchi ili kuhakikisha kuwa wananchi wanapata huduma zote za kijamii.

Akiongea na watumishi wa Kata ya Kolo Katibu wa Chama Cha Mapinduzi Wilaya ya Kondoa Ndugu Kitte Mfilinge katika kikao kati ya kamati ya siasa wilaya na watumishi wa kata hiyo hivi karibuni, amesema kuwa imebainika kuwa watumishi wengi wa kata hiyo hawana mahusiano mazuri hali ambayo inawanyima haki wananchi ya kuhudumiwa.

Alisema kuwa serikali imekuwa ikileta fedha za miradi lakini utekelezaji wake unasuasua na wananchi hawapati taarifa za miradi hiyo hali ambayo inawakosesha wananchi haki ya kujua miradi na utekelezaji wake na hakuna siri yoyote wao kutokujua.

Aidha aliongeza kuwa viongozi wengi wa vijiji na Mtendaji wa Kata hawaitishi mikutano kwa ajili ya kusoma mapato na matumizi hali inayowaumiza wananchi kwa kutojua matumizi ya fedha zao hivyo kupitia kikao hicho watendaji wote wawe na sura ya kujenga na si kukomeshana.

Hata hivyo aliongeza kuwa lengo la kikao hicho ni kuhamasisha maendeleo kwa ajili ya wananchi bila kujali itikadi ya vyama kwani maendeleo hayana chama hivyo maazimio yake yalete amani na maendeleo katika kata ya Kolo kwa manufaa ya wananchi wa Kolo.

Naye Mjumbe wa kamati ya siasa ya CCM Wilaya ya Kondoa Mh. Edwin Sannda alisema kuwa watendaji wanapaswa kuwajengea wananchi umoja ili wajiletee maendeleo kutokana na mipango watakayojiwekea katika vikao vyao vya kata na vijiji.

Akifunga kikao Mwenyekiti wa CCM Kata ya Kolo Mh. Hamad Ally Majala alisema kuwa mtumishi ambaye hatawajibika kwa nafasi yake atawajibishwa kwani wananchi wanataka maendeleo na wao kama wenye ilani hawana nia ya kuwakomesha watendaji hao ila watashirikiana nao kuhakikisha wananchi wanapata huduma stahiki na kwa wakati.