MAJI KULETA AMANI KONDOA MJI

Tarehe iliyowekwa: February 1st, 2018

Waheshimiwa madiwani wa kamati ya Fedha, Utawala na Mipango wa Halmashauri ya Mji Kondoa wamewashukuru wakandarasi wanaotekeleza kazi ya usambazaji wa miundombinu ya maji inayoendelea mjini.

Shukrani hizo wamezitoa wakati wa ziara ya ukaguzi wa miradi iliyofanyika hivi karibuni ili kujiridhisha na hali ya utekelezaji wa miradi ya maji mjini.

Akiongea kwa upande wake mjumbe wa kamati Mh. Athumani Kipaya amesema kuwa wakandarasi hao wamefanya kazi kubwa licha ya changamoto wanazokabiliana nazo na miradi ipo katika hatua nzuri na ana imani itakamilika kabla ya wakati jambo ambalo litaleta amani kwa wananchi wengi ambao wanakosa huduma hiyo muhimu.

Aidha Makamu Mwenyekiti wa Halmashauri ya Mji Mh. Zainabu Haroub alisema kuwa wakandarasi hao wamewajengea heshima kwani kazi waliyofanya inaonekana na wao walienda kujiridhisha na kazi iliyofanywa baada ya kupokea taarifa kutoka kwa Mhandisi wa Maji wa Halmashauri.

Aliongeza kuwa walisaini mikataba hadharani kwa wananchi na kwa kazi wanayoifanya hawana budi kuwashukuru na kuwataka kumaliza haraka na kwa wakati na kwa viwango ili wananchi wapate huduma na kumpongeza Mhandisi wa Maji Mji Nyamwanja Bwire kwa usimamizi mzuri.

Akiongea kwa niaba ya wakandarasi Mhandisi Makusudi alisema kuwa wanafarijika kutembelewa na Waheshimiwa madiwani kwani inawasaidia kuwapa moyo na kufanya marekebisho mapema palipo na kasoro kuliko kusubiria hadi mradi umekamilika.