Makazi Solution Wapongezwa Kwa Kuchangia Maendeleo

Tarehe iliyowekwa: May 23rd, 2019

Mkurugenzi wa Halmashauri ya Mji Kondoa Msoleni Dakawa ameishukuru Kampuni ya Upimaji Viwanja ya Makazi Solution kwa kutoa kiasi cha Shilingi laki saba kwajili ya kuchangia shughuli za maendeleo na kijamii.

Shukrani hizo alizitoa ofisini kwake wakati wa makabidhiano ya fedha hizo zilizotolewa na kampuni hiyo hivi karibuni.

“Fedha hizi ni kwa ajili ya kuchangia ujenzi wa madarasa Shule ya Sekondari ya Bicha, Shule ya Msingi Maji ya Shamba na kwa ajili ya shughuli za UMITASHUMTA .”Alisema Dakawa

Aidha aliongeza kuwa anawapongeza kampuni hiyo tena kwa kuwa wamekuwa wakiunga mkono shughuli zinazotekelezwa na Rais Dkt. John Magufuli ambaye amekuwa akitoa fedha za utekelezaji wa miradi ya maendeleo katika sekta za Elimu, Maji na Afya.

Kwa upande wake Afisa Masoko wa Kampuni ya Makazi Solution Bwana Said Mohamed alisema wametoa fedha hizo kama fadhila kwa jamii ya Kondoa na kuunga mkono utekelezaji wa Ilani ya Chama Cha Mapinduzi na kuishukuru Ofisi ya Mkuu wa Wilaya kwa kuwapokea na kufanyakazi pamoja nao.

Hata hivyo Mtendaji wa Kata ya Kilimani Bwana Gershom Utonga ambaye amepata fedha hizo alisema kuwa wao wanaona fahari kupata fedha hizo kwa ajili ya ujenzi wa madarasa katika Shule ya Sekondari ya Bicha kwani ni jambo la kizalendo na kuahidi kuwaunga mkono kampuni hiyo katika kutekeleza kazi zao kwa maendeleo ya wananchi wa Kondoa.