"Marufuku Kufanya Biashara Bila Kitambulisho Cha Ujasiriamali"- Dkt. Mahenge

Tarehe iliyowekwa: May 27th, 2019

Mkuu wa Mkoa wa Dodoma Dkt. Binilith Mahenge amepiga marufuku wajasiriamali kufanya biashara  bila ya kuwa na  vitambulisho vya ujasiriamali katika masoko ya Wilaya ya Kondoa ikiwa ni pamoja na wakurugenzi kutowatoza ushuru wajasiriamali wenye vitambulisho.

Agizo hilo alilitoa katika kikao cha uhamisishaji  uuzaji wa vitambulisho kilichofanyika katika ukumbi wa mikutano wa Kondoa Irangi Kondoa hivi karibuni.

“Mjasiriamali yoyote ambaye mauzo yake hayazidi shilingi milioni nne kwa mwaka lazima auziwe kitambulisho na akivae shingoni na naamini wapo wengi bado hawajauziwa hivyo tutoke kwenda kuwauzia na tuhakikishe kila mmoja ana kitambulisho.”Alisema Dkt. Mahenge.

Aliongeza kuwa halmashauri hazipaswi kuwatoza ushuru wajasriliamali wenye vitambulisho na kuwataka wajasiriamali wote ndani ya masoko kuweka utaratibu wa kuhakikisha soko linakuwa safi kutokana na takataka wanazozalisha sokoni hapo.

“Awali wajasiriamali wadogowadogo walikuwa wanazunguka na serikali ikaamua kuwarasimisha kwa kuanzisha vitambulisho ili watambulike  lakini hili pia limefanywa ili kuhakikisha kila mjasiriamali analipa kodi.”Alisisitiza Dkt. Mahenge.

Hata hivyo aliendelea kueleza kuwa kwa wajasiriamali kununua vitambulisho wanaongeza pato la serikali ambapo fedha zinazopatikana  zinasaidia katika utekelezaji wa miradi mikubwa ya maendeleo ikiwemo ujenzi wa reli ya kisasa, ununuzi wa ndege na ujenzi wa vituo vya afya nchi nzima.

Hata hivyo Dkt. Mahenge alitumia fursa hiyo kuwataka wakurugenzi kusimamia utekelezaji  agizo la kupiga marufuku matumizi ya mifuko ya plastiki ambapo yatakoma ifikapo Mei 30, 2019.